توام گه‌پ تشماڵ به‌م

گه‌پێ له کورده‌ماڵ به‌م

دویه‌تێ هاله‌ێ خیاڵه

تویله، چویزه مناڵه              

دویه‌ت چما میوانێ تیه‌ێد

رمه‌ێ دیواخانێ تیه‌ێد

خشخش خه‌ڵخاڵێ تیه‌ێد

زڕه‌ێ سکه‌ێ شاڵێ تیه‌ێد

سفێ سرخاو خوه‌ێ داس

هه‌جوى خوه‌ر تاو خو‌ه‌ێ داس

جوى‌ که‌و  شاقه‌شاقێه

کام  گاکه‌و‌تر لاقێه؟                      

گیانی جوى ئاگر سزێ

له وه‌یشت ته‌و ئه‌ڵکزێ                

سه‌روه‌ن له شوونی کڕ که‌‌ێ

کونه له ئاو جوو پڕ که‌ێد

کوڕ له شوونی هه‌ێ هه‌ێ که‌ێد

ده‌س ناس له سویره‌ت  وه‌ێ که‌ێد

سه‌ونزه‌ی باڵابه‌رز  وساس

سوخمه‌ی له پوینگه پووشاس

شاپه‌روره ئه‌ی له‌یلا

ده‌س که‌ێده زڵفێ و  وا

ساێه  ئه‌و رێ داخه‌ێدن

نم نم واران داێه‌ێدن

واران که‌ی که‌ێد، ئه‌لان که‌ێد

دووس که‌ێ دڵ به‌ێد؟ ئه‌لان به‌ێد

دویه‌ت سوخمه‌گه‌ێ  که‌نێدن

وا ته‌مویره ژه‌نێدن

کوڕ له‌چگ ده‌ێدن له سه‌ر

فه‌ره‌نجی نوو که‌ێده وه‌ر

قه‌ێ قه‌تارێ داوه‌سێ

بڕنه‌و  ها له  ناو  ده‌سێ

کولگاو،  ئه‌سپ  خوه‌ش  رکاو

جوى   گه‌نگیر ‌ ها  پێچ  تاو

دویه‌ت  هیما  ها ‌له مووده‌ێ              

سویه‌رمگ  ده‌ور چه‌و راێ خه‌ێ

ئاوه‌ڕه‌شه‌ێ‌ ده‌ر  که‌ێدن

شه‌وى   نوو   له   وه‌ر   که‌ێدن

کوڕ ‌هه‌ێ   که‌ێدن ‌له ‌کولگاو

تافنێدن جوى لافاو

ئاگر  ها له ده‌روینێ

کوڕ سیتگ خه‌ێدن خوینێ         

دویه‌ت د‌ه‌به‌ێ ها ته‌لیسێ

له ژیر  واران  فیسێ

یه‌ی پای ‌ها ده‌یشت ‌یه‌کێ  ناو

یه را نیاد هڕه‌ی کلگاو؟

خرمه‌ی لاو ‌گه‌نگیر ته‌ێد

هه‌ێ روو یه خوو  ئایه‌م به‌ێد

کوڕ چوى تواێ به‌ێ له ئاو

تواێ چوى ده‌رچوو کولگاو؟

دویه‌‌ت زانێدن دڵ لیوه‌س

نه لاو زوورێ ته‌ێد نه که‌س

لافاو نواێ دڵ نیه‌گرێ

نواێ یه‌ێ  لاێ دڵ نیه‌گرێ

ئاو و ئاگر جه‌مه‌و و بوون

بایا را دڵ  خه‌مه‌و  بوون

دویه‌ت ها له‌ێ گیرو داره

سه‌رێ  گه‌رم ئه‌ێ کاره

دڵ سیتگ خوه‌ێد هاله جووش

هڕه‌ێ کولگاو مایده گووش

د‌ویه‌ت د متر باڵا که‌ێد

قاپی درانه وا که‌ێد

ئینگه وساسه‌و واران

خان  خو‌ڕیه‌ێد  له  سواران

سه‌یر  پشت  ده‌روه‌چ  که ن

ده‌س  شاپه‌روه‌ر‌ ماچ که‌ن

ده‌نگ له  سوار‌ه‌یله‌و ‌ نات

دنیا ها له کیش مات

هه‌ێ خان سوارێ نیه

که‌سێ دیارێ نیه

سواره‌یل گشت ئاو بردان

وانه له شوین لاو بردان

فه‌قه‌ت  تنویدن دڵوید

وه‌نه تنیش هه‌م مردوید

شاپه‌روه‌ر پا نه‌ێده‌و‌ وه‌ر

پاێ خان نه‌ێده‌و بان سه‌ر

خان ئه‌ڵسێد وه یه‌ێ جار

دوینێ ها له قه‌ند‌هار