به‌شم گریانه
له‌وره گووش به‌ده‌نگ دادو بى دادم
تو جوور شیرین و منیش فه‌رهادم
به‌و تا بگیرێم وه چه‌و پڕ ئه‌سرین
تن ڕا من بگیر ومنیش ئه‌ڕا شیرین
ئیمه هه‌ردوگمان گیرى توایمن
خوه‌شى كه‌ى دیمن وه تیه‌ڵ ژیایمن
هایده ناو دڵم وه قورئان قه‌سه‌م
سوزانیده‌سه‌م نیه‌زانم وه‌خوه‌م
تن زانید خه‌فه‌ت كردید وه به‌شم
بیس وچوار سه‌عات كز و نه‌خوه‌شم
شه‌رتوو له داخد سیه بپووشم
بى تن شه‌را و خوه‌شى نه‌نووشم
شه‌رتوو له داخد دى یادى نه‌كه‌م
خوه‌شیم دى نه‌ما گشتى بى وه‌خه‌م
شه‌رتوو له داخد له‌یره نه‌مینم
تاكه‌س نه‌زانى ڕا چه خه‌مینم
شه‌رتوو له داخد له هه‌ر كوو نیشم
فكرت بكه‌م و هه‌ر ئاخ بكیشم
كه‌فیگه‌و هویرم قسیه‌یل جواند
من بویم وه خوینى چه‌ن كه‌س له‌باند
بخه‌ره‌م ئه‌و هویر جوور دڵداره‌یل
نه‌كه‌ره‌م وه یه‌تیم له‌پاى دیواره‌یل
یه‌و جا وه‌دروو بپرس هه‌واڵم
كزم كردیده‌و له زووان لاڵم
دى ته‌مام سوزیام زامم هاوه ئیش
دڵمیش سیه بوى له قه‌وم و له خیش
یه چ ڕووژیگوى هه‌ردوگمان یه‌ك ناسیم
گیرووده‌ى گیژاو ده‌ریاى وه‌سواسیم
وه‌سواس كوشتگه‌سه‌م بڕه‌س وه دادم
تیمارم بكه‌و بییه نه‌جاتم
