بنار بچم

مێ بچم، پشت سەرم حەرف ئزافه نوشن

نه دروو بێن نه تەعریفم وه گەزافه نوشن

مێ بچم، دەنگ نمەهم ماڵ دڵم کشماته

«فچو فچ»، «راو رەوەن»، «فاڵ و خورافە نوشن

ئێ بنارێ کەتم ئەر گِل، لەش دڵ کوت کوت بی

رمێامه، قسه ئەژ خەرمون و بافه نوشن

مه گه هومزاد خەمم، بار خەمیش ها تاڵەم

«یه نهاته»،  «دی ئەڕا چه!»، «یه خڵافه» نوشن

روژەلم چۆ شو تارن ،شو ئەڵم شو زەنگه

شەپه تویتون دی نەهن!  داد و مرافه نوشن

وه مدوم هەڵپڵه خاو کردنەلم هوکارەم

«وژه مەگرێ»، «یه دی چاتێ!»، «ها قیافه» نوشن

یه گه سووزیا هێ وه بێ دۆێ، کەپەر عومرم بی

بی چەق و پوقه سووتن دڵ، «یه گزافه» نوشن

دته! بەس که! هەێ نەخوەن موور و مەتەڵ، دیەر هۆ که

ڕێ کوڤر ها ئێ وەرت، ئەر «جەده سافه» نوشن 

هومه کە مات تەماشاێ خەمینو، دەس خوەش

دێ چەتو نەژ منه مێ!؟ «ای قسه لافه»  نوشن