ئيواره
منيش سه‌رد و
تيه‌ڵ و گيژم.
كرماشان تواى قويتم به‌ى
خاس خاس
جايده‌م و
ئه‌ڵتفنيده‌م
[به‌د چيژم.
***
ئــــــــاخ خ
چ خوسه‌ى تاقه‌ت بڕى
ها له گيانم.
تيه‌ريك و تيه‌ڵ
سه‌رد و سڕ
[چوى وژدانى زه نگولَه به‌سياى ئى قه‌رنه
ئـــــــــاخ خ
چ په‌راوى خه‌مى سه‌ر ده‌رهاورديه
له ئوقيانووسى ژانه‌يلم.
***
له چوارده ڕيانى وجاخ
سێ كه‌س نيشتنه
[وه بى وجاخ.
ئيواره‌يه
سه‌رده
]چ سه‌رديگه
زمسانه.
سێ كه‌س
وه بى كه‌س
له چوارده ڕيانى وجاخ
وه بى وجاخ.
پيايگ و ژنيگ و منالَيگ
وه بى په‌نا
مه‌حفلى سه‌رد و سڕ
له بياوانى ئى خياوانى
پڕ ڕيواره
له‌ى ئيواره[.
ئـــــــــاخ خ
له‌ى سه‌رديى تاقه‌ت بڕه‌گى
ها له له‌شى ئى شاره.
***
سه‌رى سه‌ردييش سوڕ مه‌نيه
له‌ى سه‌رديه.
گومانم بوى
خودايش
له مالَه كڕ وكپ وگه‌رم ونه‌رمه‌گه‌ى
نايده و ده‌ر.
ئاخ و ئاو و
تكه‌ى ئه‌سريش
ڕچگيانه وه يه‌ك سه‌ر.
سێ كه‌س
له هويره‌وچى
بى جى و لوور و
بى په‌نا
له بياوانى ئى خياوانى
پڕ ڕيواره
له‌ى تيه‌ريكيى ده‌مى ئيواره.
***
زمسان تيه‌يد و
بوو وه له‌رز و
چوى ناى نيشته‌ر
سلوول سلوولى له‌شيان
ده‌رزى ئاژن كه‌يد.
وه‌ى له‌ى تيه‌ريكيى سه‌رده
وه‌ى له‌ى سه‌رديى تيه‌ريكه
***
ڕيواره‌يليش
سه‌ر وه قه‌يوه‌ن
چوى زڕاتى
له قه‌وچلَ ده‌رناتى
وشك ئه‌لاَتى
وه قاقولى ڕچگياگ و
هه‌ناسى سه‌رد و
چلَمى شووڕى يه‌خ به‌سيا
وه‌ره‌و بى سه‌ر و شوونيى سوو
تهڵه‌پا كوتن.
كه‌س نيه‌نووڕى
وه‌ى سى كه‌سى
بى كه‌سه.
م ئه‌مما
بى تاقه‌ت له‌ى خوسه‌ى قويله
له‌ى شه‌وارى سيه و سه‌رده
له‌ى زمسانى كرماشانه
خه‌رك و خنكيام
له گه‌رداوى
ئوقيانووسى
ئرمسه‌يلى له چه‌وناتى م.
سه‌رگه‌ردانم
چوى ناى گه‌لاى
زه‌رد و وشكى
له تووفانى
سامان كه‌نى
هه‌ناسه‌يلم
ك زندانن له حسارى پوولاَى خوسه‌م
***
بى تاقه‌ت و
سه‌رگه‌ردان و
سه‌ر وه قه‌يوه‌ن
بى توانا و بى ده‌سه‌لاَت
له خوسه‌ى دلَ
هه هه‌يژده‌هاى
سه‌ركوت كرياى
نيمه‌گيانى ئى زمسانى
كرماشانه
له‌قه‌كوت كه‌م
له منه‌يى
مالَى كڕ و كپ
گه‌رم و نه‌رم و
ئاسووده و خوه‌ش
ئرا هه‌رچى
بى كه‌سى و
بى جى و لووره
چه‌و پڕ له ئه‌سر
دلَ پڕ له ئــــــــاخ
ڕوى پڕ له شه‌رم
