ئه‌ی په‌پو

من وه‌تم راز دڵم ، تو مه‌حره‌مى  ئه‌سراره‌گه‌م

تا بزانى شوون كى بگرى له‌ ئه‌و بووسان من

هاله‌ ویرت ئه‌و ده‌مه‌ دامه‌ت وه‌ ده‌ستى باى شه‌ماڵ ؟

چه‌ن گله‌ باڵت شكانى ئه‌ى ده‌سى له‌رزان من

تا بچى مه‌نزڵ وه‌ مه‌نزڵ ، گوڵ وه‌ گوڵ بگری سوراغ

من سپاریمه‌د وه‌ باد و به‌دره‌قه‌د چاوان من

زوى بچوو ، زوى به‌وره‌وه‌ ، باره‌ خه‌وه‌ر له‌ ئه‌و گوڵه‌

من دڵم پڕ زامه‌ن و هه‌ر یاره‌گه‌م ده‌رمان من

یار نازار و جووان‌شیرم كووه‌ ؟ بویشه‌ وه‌ پیم

مه‌رهه‌مى بویدن له‌ بان سینه‌گه‌ى بریان من

هه‌‌م دوواره‌ دیمه‌ده‌و رووژى تره‌ك وه‌ ده‌روه‌چى

هه‌ر وه‌ ده‌س ده‌س هاتیاى تا وه‌ دیوه‌خان من

تا ره‌سیده‌ جى قه‌سه‌م خواردى وه‌ گیره‌ى دایه‌ پیر

هه‌م قه‌سه‌م وه‌و وه‌خت دیره‌و ماڵه‌گه‌ی ویران من

من گوناهم نه‌ویه‌ «هوومه‌ت» ئه‌و گوڵد لاله‌ بیه‌

گووش گه‌ردوون و فه‌ڵه‌ك كه‌ڕ بى وه‌ هه‌ى ئامان من