ئه‌كبه‌ر ره‌زایی
نیه گه‌ردێ بۊشم ، له چه‌رخ زووان
هه‌ساره‌ێ به‌ختم، فه‌ڵه‌ك هه‌ڵگران
سیمورق هاتێێه، گل یه‌ی كه‌ێ ڵه قاف
وه ئاه و ناڵه ، هه‌م له‌سینه‌ێ ساف
ده‌س خه‌م سه‌رتیل ئاسمان كرده و
لوره‌ێ پیره‌مه‌رد ،كزه‌ێ شووانه
چه‌پ بۊدن ، چه‌بۊد ، چه‌رخ زه‌مانه
خودا خوه‌ێ گیرس ،زه‌رتشت وه‌ڕۆ ڕۆ
هه‌م كۆچ كورده‌یل ، دریا وه‌ره‌و كۆ
ناڵه‌ێ چه‌مه‌ری ، زاگرۆس ،گرده وه‌ر
سه‌حه‌ری ژه‌نن ،ئه‌ڕاێ بێ خه‌وه‌ر
هه‌م باڵا به‌رزه‌یل ، په‌ڵنگێان بڕیا
شه‌ۊ سیه له وه‌ر ،داڵاهو كریا
كه‌ڵڕ له له‌چگ ،ئه‌ڵوه‌سا كوته‌ڵ
كوچگ تێده و ده‌نگ ، بۊ وه مه‌ته‌ڵ
ژنه‌یل وه‌تن له، قوڵ گه‌رمه‌شین
وه‌یه بنۊسن ، له‌رۊ كه‌له‌شین
له‌قه‌ێ بێ‌ستۊن، فه‌رهاد بكه‌نێ
پامۆره‌ێ دڵگیر باربُد بخوه‌نێ
كه‌ڵڕ و هورام ، دی نیه‌كه‌ن هوره
له خوسه بار كه‌ێ مه‌ل ئه‌هوره
ته‌مۊره‌ێ گوران ،له خه‌م بژه‌نێ
به‌رگ سه‌وز له‌وه‌ر ، وه‌هار بكنێ
شاهۆ شین كه‌ێدن ، سیروان ناڵه ناڵ
بی‌ستۊن له خه‌م ، سه‌ری بۊ خاڵ‌خاڵ
تافه‌ی تاق وه‌سان ، نیشته‌سه كزی
وه‌نه‌وشك نه‌چه‌قی، وه‌نه‌و‌شه ڕزی
هه‌ناسه‌ێ زه‌رتشت قه‌لاجه ڕمان
دیه چۊ خه‌م پشت ، داڵاهۆ چه‌مان
مژی سۊره ته‌م ،داڵ له داڵاهۆ
په‌ڕێ له سیمورق هه‌ڵكزان شاهۆ
شاپه‌ر سیمورق ، شنه‌ێ تێ وه گوش
مانش بێ هۆش ، تیه‌رێدن وه‌هوش
نیشت له هه‌له‌بجه ، مه ل ئه‌هووره
كارێ دی نه‌كرد شاپه‌ڕ له‌و ئه‌وره
