ئایا له "ئه‌رووس زاگروس" شێعر ژنانه هه‌ڵسياس؟
به‌رزه‌و کردگه و هه‌ڵسياس و وه شيوه‌ی وه‌رفراوان شاعره‌يل و نويسه‌ره‌يل له بوار چاپ و به‌رهه‌مهاوردن،ئاسه‌واره‌يل خاسيگ بڵاوه‌و کردنه. وه‌لی له ئیلام ک وه "ئه‌رووس زاگروس" ناسرياگه وه خاتر دويری و وجوود شيوه‌زووانه‌یل جووراجوور تا راده‌یگ ئه‌ى خه‌ته تويش گیر و گرفت بويه. له ته‌ماشاكردنيگ خێرا، وه‌ى دو ده‌یه‌ى جمشت ئه‌ده‌بيه چه‌ن خه‌سارناسی و زه‌ره‌يگ سه‌ره‌کی وه‌دی كريه‌ێ ک وه کوڵی ئاماژه وه‌پی ئه‌کريه‌ێ:
1- زووان: له ئیلام چه‌نه‌ها، شيوه‌زووان سه‌ره‌کی هه‌س ك وه داخه‌و شاعره‌يل نه‌تويه‌نستنه پروسه‌ی پێوه‌رسازی زووان له‌ى ساڵه‌يله ئه‌کتیڤ بکه‌ن به‌ڵکم، هه‌ر کاميان سه‌روه‌خوه‌ی ته‌نیا له شيوه‌زووان خوه‌ی نه‌ف وه‌رگرن.2- ژانر و ناوه‌ڕۆک: فره‌تر ناوه‌ڕۆک شێعر ئه‌ى ده‌ورانه فره‌تر نوستالوژی وه ژیان کووچه‌ری و داب و نه‌ريت عه‌شایری و هه‌ميش گه‌شت له سروشت و که‌ژ و کويه‌س.
ژیان و ژیار شارنشینی و باس کومه‌ڵایه‌تی ئمڕوو که‌متره و جى ژانره‌یل تر جوور: كوڵه‌مه‌ته‌ڵ، په‌خشان،... فره لاوازه. 3- فورم و قاڵب: به‌ش فره‌يگ شێعر ئیلام له بار قاڵبه‌و فره‌تر مه‌سنه‌وی وغه‌زه‌ڵ و دوبه‌یتیه .شێعر نوو که‌متر کار کرياس، ئه‌گه‌ریش کارکرياگه وه‌خاتر زاڵبوين هویر ته‌نگ سه‌له‌فایه‌تی،پێشوازی له‌لى نه‌کرياس.هه‌ميش فره‌تر شاعره‌يل پیاون ئه‌گه‌ریش دويه‌تيگ شێعر نويساس هویر و فكر پیاوسالارانه له مه‌ژگی زاڵ بويه.
وه‌لی خوه‌شبه‌ختانه له‌ى دوياخره وه‌خاتر هات و چوو، په‌يوه‌ندی، ئینترنت و تێکۆشان رووشنهویره‌يل،
وه‌زعه‌گه ئاڵشته‌و بويه، چین شاعر جوان، وه هویر و فکر نوو و تازه وه‌ره‌و ئاستيگ ئمڕوویی و ئيسته‌یی ئه‌چن. له‌يانه خانم" سومیه‌ی مێهریه" ک فره نووخوازانه له بار هویر ژنانه و ناوه‌ڕۆک ئمڕوویيانه و فورم پێشڕه‌ویانه كوتاس و کاریگه‌ریش بويه له بان دويه‌ته‌يل و ره‌فيقه‌يل تر خوه‌ی.
سومیه‌ی مێهری له ساڵ1387 ز. له شار ئیلام هاتگه‌سه دونيا و کارناس کومپیوتره، ئيسه‌يش ئه‌ندام کارای ئه‌نجوومه‌ن"هانا"س. تا ئيسه نزیکه‌ی50 پارچه شێعر له قاڵب نوو و کڵاسیک وتگه، هه‌ميش له بوار كوڵه مه‌ته‌ڵيش خه‌ریک كاره. ناوه‌ڕۆک فره‌تر شعره‌يل مێهری عشق و خوه‌شه‌ویسى وکومه‌ڵایه‌تی و فمێنستیه. شێعره‌يلی پڕ له هس و دڵگیر و ره‌وان و ساده‌س فره‌تریش ته‌قالا كردگه زووان شێعری وه‌ره‌و ئاست ستاندارد بواد:
☼ سومیه‌ی مێهری – ئیلام
چراخه قرمزوى، رفتێ کوتاگه‌م
گوڵێ دامه‌ێ قروشێ، روى نێا وه‌م
دويه‌ت هامساگه‌مان سانته‌فه دێرێ
منیشه گوڵ فروش چارڕاگه‌م
Çiraxe Qirmiz ȗ, Riftŷ Kutagem
Gollê Dameŷ, Qiruşê, Rȗ Niya Wem
Dȗeti Hamsageman Santafe Dŷrŷ
Minişe, Gollfiruşi Çarragem
***
تا کول روژێ، هه هامه فێر مه‌ردم
چه‌مم، ها وه ده‌سه‌یل سێر مه‌ردم
له جی یه نه‌قڵ مه‌ردم بووگه شێعرم
خوه‌می بويمه وه نه‌قڵ شێعر مه‌ردم
Ta kul Rojŷ, He Hame Fŷr Merdim
Çemim Ha We Deseyli Merdim
Le Ci Ye Neqlli Merdim Buge Șŷrim
XwemÎ Bome We Neqlli Merdim
***
چه‌مم، ها وه کل سه‌رد چه‌مه‌یلێ
چه‌م ئاێم گرن هه‌رد چه‌مه‌یلێ
چه‌مه‌یلم نويقنم ها ده چه‌مه‌یلم
چ تويشێ هاتمه وه‌رد چه‌مه‌یلێ
Çemim Ha We Kili Serdi Çemeylŷ
Çem Aŷim Girn, Herdi Çemeylŷ
Çemeylim Nȗqinim, Ha De Çemeylim
Çi Tȗșŷ Hatime Werd Çemeylŷ
