شەفەق نیوز- دانشگای پەیام نوور ئێران وانگ داگە ک سێ ئیلامی وە بوونەی کارەیل تەحقیقی وەر چەم گرێ ک کردنە، خەڵاتی کریانە.

دوکتور موراد مورادی موقەدەم، کارمەند دانشگای پەیام نوور دێلێڕان (دێهلوڕان) یەکێ لەی سێیانە بییە.

دوکتور مورادی‌موقەدەم، دوکتورای تاریخ گرتگە و تزەیلەی خوەێ ئەڕا دوکتورا و فەوق لیسانس، دە بان تاریخ کورد فەیلی نووسانگە.

ئەوی کتاوێ دە بارە‌ی تاریخ کورد فەیلی دە دەوران والییەیل پێشتکۆویش نووسانگە و بێ ژە ئی کتاوە، چەن مەقاڵە‌یش دە بارەێ کورد فەیلی بڵاو کردگە ک یەکێ لەیان دەبارەی (دۆزەمە و کێشەی کورد فەیلی ئەڕا گرتن ناسنامە دە میژوو یەکسەد ساڵ عراق) بییە.

ئی کێشە، هێمان ک هێمان دەس لە ئاوار کورد فەیلی نەچەکانگە.

دوکتور مورادی موقەدەم، وەر ژە یە، رەییس شەورای شار دێلێڕان بییە و خوەێ لە ئێڵوەندەیل ئێڵ کورد پەهڵەیی (کوردەلی)یە.