شەفەق نیوز/ لە هۆڵ سەعەد عەبدولڵا لە شار هەولێر پایتەخت هەرێم کوردستان، لە سەرەتای مانگ نیسان لە ساڵ ئایندە، کۆنفرانسیگ ناودەوڵەتی ئەرا بەڵگەکردن تاوانەیل جینۆسایدکردن کوردەیل فەیلی لەلایەن رژیم سەدام حسێن ئەوەسا ئەنجام دریەێد.
کۆنفرانسەگە ئەوەسا وە پەنج زوان کوردی و عەرەبی و فارسی و ئینگلیزی و فەرەنسی وەڕیەو چوود.
عەبدولڕەحمان دەرویش سەرۆک دەسەی ئامادەکاری کۆنفراسەگە ئەرا ئاژانس شەفەق نیوز ئویشێد: کۆنفراسەگە ئەوەسا لە چوار نیسان لە ساڵ ئایندە ئەنجام دریەێد، و تا ماوەی سێ رووژ وەردەوام بوود، ک لەلایەن سەرکردەی کورد مەسعود بارزانی و حکومەت هەرێم کوردستان پاڵپشتی کریەێد.
دەرویش ک دکتۆر زانستەیل سیاسیە لە زانکۆی سۆران، هەمیش ئویشێد: کۆنفرانسەکە وە ئامانج ناسانن وە لایەنەیل تاوان جینۆسایدکردن و تۆێژینەوە و توومارکردنی و خستن رووشنایی لە جویراجویر سپۆڕیەیل زانستی لەبان، و هاندان تۆێژینەرەیل ئەرا باوەت ئی تاوانە تا نووڕینەیل زانستی پیشکەش بکەن تا دەسمیەتی لە چارەکردن ئەو گرفتەیلە بکەن ک کورد فەیلی وەخوەی دوینێد، و تەقەلای وەدەسهاوردن دان ناودەوڵەتی وەی تاوانە.
دەرویش وتیش: کۆنفراسەگە ئەوەسا تەقەلا دەێد لایەیل جیاجیا لەی تاوانە بکەێدە بەڵگەنامە وەگەرد دەرخستن رۆل هەرێم کوردستان جویر ناوەندیگ جەهانی ئەرا تۆێژینەوە لە تاوانەیل جینۆساید.
دەرویش وتیش: لایەیەیل سیاسی وهویری ویاسایی و میژوو و روشنهویری و ئابووری و جوگرافی و راگەیانن کەفنە ئەو باوەتەیلە ک ئەوەسا کۆنفرانسەگە باسیان کەێد، وەگەرد لایەیلیگتر گرنگ ک دەسمیەتی لە رەسینەو لەی باوتەگە لە گشت لاییگ دەن.
جی باسە ک رژیم وەرین بڕیگ لە هەڵمەتەیل جینۆساید لەبان گەل کورد جیوەجی کرد، و کورد فەیلی بەش گەورەیگ لەی هەڵمەتە کەفتە پی، ک کەفتنە وەر هەڵمەتەیل کوشتن و بڕین و جینۆسایدکردن و بارکردن، ک ئەرا ساڵەیل درویژیگ وەردەوام بوین.
لە ماوەیل گوزەشتە زفرە لەی تاوانەیلە دویای رمیان رژیمەگە لە ساڵ ٢٠٠٣ کریا بەڵگە، باوجی توومارکردنەگە تا ئیسە نەڕەسیەسە ئاست ئەو تاوانەیلە ک وە کورد فەیلی کریان.