شەفەق نیوز/ شاندیگ لە پەرلەمان هەرێم کوردستان، ئمڕوو دووشەممە، سەردان ئەو ناوچەیل سنووریە کرد ک کەفتنە وەر گورزەیل ئیران.
موحسن حسێن ئەندام دەسەی ناوخوەیی لە پەرلەمان ئەرا ئاژانس شەفەق نیوز وت: سەردان شاند پەرلەمان ئەرا نووڕینیگ زیاتر لەو ناوچەیل سنووریە تیەێد ک لە ماوەی رووژەیل گوزەشتە کەفتنە وەر گورزەیل ئیران و تورکیا، و پیشکەشکردن راپۆرتیگ هویرد ئەرا سەرۆکایەتی پەرلەمان لەی باوەتە.
وتیش: ئەو ڕاپۆرتە ک ئەوەسا لەلایەن شاندەگە ئامادە کریەێد هەمیش نووڕین تەواوی ئەرا رەوشەیل ژیان و گوزەرانی ئەرا دانیشتگەیل ئی ناوچەیلە وەگەرد وەردەوامی تووپ ومووشەکەیل هاناوی.
وتیش: ئمڕوو شاندەگە سەردان قەزای چۆمان لە پارێزگای هەولێر کرد، و ئەوەسا هەمیش سەردان ئەو ناوچەیل کەێد.
هەرلیوا، سەرچەوەیگ ناوخوەیی ئەرا ئاژانس شەفەق نیوز وت: هیزەیل ئیران لە دویەکەو لەنزیک سنوورەگە گردەو بوینە، باوجی لە سنوور هەرێم کوردستان رەد نەکردنە.
ئمڕوو دووشەممە، رووژنامەی "القبس" کوەیتی وت: کاروانیگ لە هیزەیل هشکایی لە سوپای پاسدران ئیران وەرد ئامێرەیل سەربازی لە ناوچەیل سنووری وەرد هەرێم کوردستان گردەو بوینە.
رووژنامەگە لە زوان سەرچەوەیلیگ وت: سوپای پاسدران ئیران هوشداری خەڵک ئی ناوچەیلە کردیە ک نەبایەت بچنە ناوچەیل سنووری وەرد عراق تا بانگوازیگتر.
وەگورەی قسەیل خەڵک ناوچەگە، کاروانەیل تانک وتووپ روی وەرەو سنوور عراق لەلای کوردستان ئیران کەن، هەمیش فڕۆکەیل بێفڕۆکەوان ئەرا ئی ناوچە هاوردنە.