ئەوەیش لە وتاریگ لە راگەیانن دروسکردن فیرقەی یەکەم و دویەم لە هیزەیل پیشمەرگە هات.
سەرۆک نێچیروان بارزانی لە وتارەگە وت: دروسکردن دوو فیرقەگە گامیگ گرنگە ئەرا وەیەککردن و ڕێکخستن هیزەیل پیشمەرگە، وتیش: ئمڕوو وەگشت شادی و خوەشهاڵی دەسکردن وە کار دوو فیرقەگە راگەینیمن، و هەرلە دوو فیرقەگە چوار لیوا و ١٢٠٠ کەس هاناوی.
وتیش: پارەکە لە رسوومەیل دەرچگن کولێژ سەربازی لە زاخۆ یەک خوەنەوار مەسیحی وەگەردمان بوی، و ئەو مەوقە داوای بەشداریکردن گشت پیکاتەیل کردم، وتیش؛ ئمڕوو ئاگادار بویم ک بڕیگ لە پیشمەرگەی مەسیحی و عەرەب و ئێزدی هانە ناو ئی دوو فیرقە، وهیمان شمارەگە کەمە، و بایەتە دەر ئەرا گشت پیکاتەیل واز بکەیمن تا بانە ناو رزەیل پیشمەرگە.
سەرۆک هەرێم کوردستان هەمیش زوور لەبان گرنگی ئەوە هاورد ک پیشمەرگە جویر هیزیگ ئەرا گشت گەل کوردستان بمینێد، و وت: ئەوەسا گشت هاز و وزەمان وەکار تیاریمن تا هیزەیل پیشمەرگە وەگشت توانایل سەربازی وەهاز بوون، و هەمیش بایەتە وە رووشنهویری و کەلتور سەربازی نیشتمانپەروەری یای بگرن.
دووپات کرد ک یەکیگ لە ئامانجەیل سەرۆکایەتی هەرێم کوردستان دووارە بیناکردن پیشمەرگە و وەیەککردنی و چاکسازییە، وتیش: جی خوەشهاڵیە ک لەبان ئەو ناکۆکیەیل سیاسیە هەر باوەتەیل وەیەککردن هیزەیل پیشمەرگە نەوسیاگە، و گامەیل فرەیگ وەرەو نوا چگیمن.
نێچیروان بارزانی وتیش: هیزەیل پیشمەرگە نیەخوازن ناویگ سیاسی یا حزبی بیاشتون، دووپات کرد ک هیزەیل پیشمەرگە لە یەکەم رووژ دامەزرانی کار ئەرا قایمکردن ئاسایش و ئارامی و ئازادی ئەرا گشت پیکاتەیل کوردستان کردن.
وتیش: گەل کوردستان و هیزەیل هاوپەیمان ناودەوڵەتی پاڵپشتی فرەیگ ئەرا وەیەککردن هیزەیل پیشمەرگە لەلیمان کەن، و پارەکە واژوو لەیەکڕەسینەوە ناوبەین پیشمەرگە و وەزارەت وەرگری ئەمریکا کریا، و تا ماوەی ٤ ساڵ نووەو کریا.
سەرۆک هەرێم کوردستان باس لە سوپاسی ئەرا ئەو پاڵپشتی و دەسمیەتیە کرد ک ئەمریکا وە هیزەیل پیشمەرگە پیشکەشی کردگە و هیمان وەردەوامە، و ئەمریکا پیشمەرگە کردیەسە هاوبەش خوەی لە جەنگ دژوە ریخریاگ داعش.
سەرۆک بارزانی وە ئەمریکا وت: هیمان تیرۆر رخیگ راسی و تەواو لەبان عراق دیرێد، و ئیمە هەر وەردەوامیمن وەگەرد هاوپەیمان ناودەوڵەتی لە نواگردن ریخریاگ داعش.
وتیش: بایەتە پووشیان حزبی لە پیشمەرگە بکەنیمن، تا ناسنامە و باوەڕ راسی هیزەیل پیشمەرگە بتەو بوود، و ئەرا گەشەپیدان توانای لەبان ئەو گرنگیە ک لەناو عراقی دیرێد، و ئی راسیە لە جەنگ دژوە داعش چەسپانیمن، و دووپات کرد ک پیشمەرگە مقیەتی کەرکوک و بەشەیل گەورەیگ لە دیالە و سەڵاحەدین کرد، و هاوبەش سەرەکی بوی لە جەنگ دژوە داعش.
سەرۆک هەرێم کوردستان وتیش: سەروەری ئەوەسە ک سەروەری هاوبەش لەناو وڵاتەگە بوود، و پیشمەرگە توەنێد مقیەتیی بکەێد، چوینکە بەشیگە لە سیستەم وەرگری عراق، و بایەتە حکومەت فیدڕاڵی پشتگیری ئی هیزەیلە بکەێد.