مەسرور بارزانی لە بەیاننامەیگ وت: “لە ساڵیاد جینۆسایدکردن بارزانییەیل، وە ڕێز و پیزانین یاد گشت قوربانیەیل ئەو هەڵمەتە ڕەگەزپەرسیە لەلایەن رژیم بەعسەو کەیمن، کە لەناوی تویش یەکیگ لە قیزەونترین هەڵمەتەیل بوین تاوانەیل پاکتاوکردن، وەی شیوە پیشەکییگ ئەرا زنجیرەیگ دویرودرویژ هەڵمەت ئەنفالکردن ترەک هاتە دی کە ناوچەیل گەرمیان و بادینان و کیمیاوارانکردن هەڵەبجە و کوشتار لەو ناوچەیل کوردستان کردە ئامانج.”
لە بەیاننامەگە وتیش: "ناوچەی بارزان کە هەمیشە قەڵای شووڕش و ڕاپەڕین و تێکۆشان بویە ئەرا وەدەسهاوردن مافەیل خەڵک کوردستان، لە ماوەی سەدەی گوزەشتە کەفتە وەر پەلامار ویرانکاری و سزانن و قڕکردن، و لەبان گشت ئەوەگ وە سەری هات، دوژمنەیل هەرگیز نەتوەنستن روح وەرخودان لەناوبیەن، یا ئومید و پەڵپ گەلەگە ئەرا ئازادی ناسەقامگیر بکەێد و تا ئمڕوییش ئی ناوچە جویر ناوەند و سەکوویگ مینێد ئەرا وەرگریکردن لە نەتەوەیی و نیشتمانپەروەری ماف و خوازینەیل گەل کوردستان.
مەسرور بارزانی دووپاتیش کرد کە “حکومەت هەرێم کوردستان، لە گشت دانوسەنینیگ وەرد حکومەت فیدراڵی، هەمیشە زوور لەبان ماف کەسوکار قوربانییەیل و کردەوەیل رژیم وەرین کردگە، کە قەرەبوو ماددی و دەروینی وەدەس بارن کە شایستەی ئەوان بوود وە ڕەنگدانەوەی ئاست ئازاریان”.
لە 31ی تەمموز ساڵ 1983 رژیم سەدام حسێن دەسکردە هەڵمەت "ئەنفال" و هەشت هەزار کەس خەڵک ناوچەی بارزان لە ناوچەگە دەسگیرکرد و ئەرا بیاوانەیل باشوور عراق بریان و کوشتەیان و لە قەورە وەکۆمەڵەیل نادەیانە خاک.
لە 3ی ئایار 2011 دادگای باڵای تاوانەیل عراق هەڵمەت "ئەنفال" ەە "تاوان دژ وە مرۆڤایەتی و جینۆساید" زانست.
جی باسە کە لە ساڵ ١٩٨٣ لە هەرێم کوردستان ڕاپەڕینیگ لە دژی دەسەڵات سەدام سەرهەڵدا، ئەراوە دەسەڵاتدارەیل عراق دەسکردنە ئۆپەراسیۆنیگ وە ناو “هەڵمەت ئەنفال”.
سەدام سەرکردایەتی هەڵمەتەگە دادە دەس سکرتێر باکوور لە پارت سۆسیالیست عەرەب بەعس، عەلی حەسەن ئەلمەجید ئەلتکریتی، کە لە ١٦ی ئازار ١٩٨٨ بووردومان ئاسمانی و توزپخانە وە بومب کیمیایی لەبان هەڵەبجە و ئاوایەیل دەورگردی جیوەجی کرد، لە پەلاماریگ کە وە "تاوان" دریا قەڵەم.
دویای 2003 ستوینەیل رژیم وەرین دەسگیرکربان و شمارەیەگیان سزادریان، لەوانە سەدام حسێن لە دۆسیەی “ئەنفال” و بەشیگیان سزای لەسێدارەدان وەبانیان چەسپیا، لەناویان عەلی حەسەن ئەلمەجید.