شەفەق نیوز/ وەڕێۆبەرایەتی کشتوکاڵی خانەقین سەروە هەرێم کوردستان، ئمڕوو دووشەممە، راگەیان زیاتر لە ٥٠٪ لە هەڵمەت درەو گەنم وەبی هیچ رووداویگ خراوکردن و ئاگردان لە گشت ناوچەگە ئەنجام دریا.
کامیران عەبدولڵا وەڕێۆبەر فەرمانگەگە ئەرا ئاژانس شەفەق نیوز وت: فەرمانگەگەی وەهەماهەنگی وەگەرد فەرمانگە پەیوەندیدارەیل زیاتر لە ٥٠٪ لە هەڵمەت درەو گەنم لە دەورگرد خانەقین و مەیدان و قوورەتو ئەنجام دا.
عەبدولڵا دیاری کرد ک هەڵمەتەگە لە درەوکردن ٢٢ هەزار دۆنەم لە خانەقین، و ٢٧ هەزار دۆنەم لە قوورەتو، و ٤٠٠٠ دۆنەم لە مەیدان بوی، وتیش؛ بەرهەمەگە لەی ناوچەیلە لە ٣٠ هەزار تەن رەد کەێد.