شەفەق نیوز/ رێکخراو گەرمەسێڕ فەیلی، دووپات کرد ک ئەوەگ وەسەر کورد فەیلی لە ساڵ ١٩٨٠ هات، شکست گەورەیگە ئەرا ئی چینە، و هەمیش باس پێشکەشکردن خزمەتەیلیگ کرد دەربارەی سەنین زەوی لە پارێزگای سلێمانی.

محسن یادگار فەیلی وەرپرس رێکخراوەگە ئەرا ئاژانس شەفەق نیوز وت: رێکخراو گەرمەسێڕ فەیلی، وەرجە سێ ساڵ دامەزریا، و ٧٠٠ ئەندام هالە ناوی و لە پارێزگای سلێمانی نزیکەی ٨٠٠ - ١٠٠٠ خیزان کورد فەیلی هەس، فرەیان لە پارێزگای بەغدادە و ئەو بەشەگە لە پارێزگایل واسیت و دیالە و بەسرەس.

فەیلی وتیش؛ ئیمە لەیرا خزمەت گشت خیزانەیل کورد فەیلی کەیمن، وەتایبەت پشتگیریکردن ئەرا سەنین زەوی ئەرایان، وەگورەی بڕیارەیل لایەن ئاسایش، و لە خود وەختەگە دووپات کرد ک پێشوازیکردن خاسیگ لە پارێزگاگە ئەرایان هەس.

و دیاری کرد ک ئەوەگ وەسەر کورد فەیلی لە جینۆساید ٤-٤-١٩٨٠ هات، خوەی رووژ شکست فەیلیەیلە، و لە ماوەی ١٠ ساڵ لەو رووژەو، زیاتر لە ٦٠٠ هەزار کورد فەیلی وەرەو دەیشت عراق بار کریا، و ٢٢ هەزار گەنج لە تەمەن ١٥ - ٢٨ ساڵان لە زیندانەیل نوگەرەت سەڵمان جینۆساید کریان، لەو وەختەو تا ئیسە چارەنووسیان نەزانریا.

لە باوەتیگ تر لە نووەوەبویەیل لە مەیدان سیاسی و رەوش کوردەیل فەیلی لە هەرێم کوردستان، یادگار باس کۆبونەوەی نویسینگەی سیاسی لە یەکێتی نیشتمانی کوردستان کرد ک لەناوی باس داواکاریەیل کورد فەیلی کریا لە داناین مافەیلیگ لەناو دەستور هەرێم کوردستان.

وباس داناین کورد فەیلی لە وەزارەت شەهید و ئەنفالکریایەیل کرد، ک رەسینەوەی خاسیگ وەگەرد ئەندامەیل یەکێتی لەی باوەتە بویە، و ئەوەسا کۆبونەوەیلیگ تر وەگەرد ئەو هێزە سیاسیەیلە لەی باوەت و داواکاریەیلە ئەنجام دریەێد.