شەفەق نیوز/ سەرچەوەیگ ئەمنی لە پارێزگای دیالە، ئمڕوو یەکشەممە، خەوەردا لە کوشیان گەنجیگ وە تەزیان کارەبا لە دەورگرد قەزای خاڵس.

سەرچەوەگە ئەرا ئاژانس شەفەق نیوز وت: گەنجیگ لەوەر تەزیان کارەبا لەناو ماڵەگەی لە ئاوای عجێمی لە ناحیەی سەلام گیانی لەدەسدا.

وتیش: تەرم قوربانیەگە ئەرا پزشک دادوەری بریا، و لێکۆڵینەوە لە رویداوەگە واز کردن.

هەرلیوا، کابرایگ مەدەنی کار رانندەهی تەنکەریگ کەێد لەبان رییگ کشتوکاڵی لە ناوچەی حەساویە خوەرهەڵات ناحیەی ئەبو سێدا وەدەس کەسەیلیگ نەناسریاگ کوشیا.

هەمیش گەنجیگ لەداڵگبوی ساڵ ٢٠٠٤ وە گولەی دەوانچە خوەی کوشت، ئەوەیش لە ناوچەی پیشەسازی  لە ناوچەی کەسرە وعەتەش بەغداد پایتەخت.

پۆلیس قەزای سوق شیوخ لە پارێزگای زیقار، دەسگیرکردن کابرایگ راگەیان ک وە کوشتن دوو مەدەنی توومەتبارە.

پۆلیس لە بەیاننامیگ وت: بنکەی پولیس ئیسماعیلیە و فەوج فریاکەفتن ٦ وهاوکاری هاووڵاتیەیل، توەنست وەماوەی چەن ساعەتیگ توومەتبار ( ح . ع. ه ) دەسگیر بکەن، ک هەرلە قوربانیەیل (ئەزهەر حەبیب عۆدە) و (حسێن عەلی هاشم) وە تفەنگ کوشتیە، وتیش: توومەتبارەگە دریا دەس دادگا تا سزای خوەی بوەێد.

ئیوارەی دویەکە شەممە، سەرچەوەیگ ئەمنی لە زیقار ئەرا ئاژانس شەفەق نیوز وت: دوو کەس لەناو مرافەیگ چەکدار لە باشوور پارێزگاگە کوشیانە.