ئەحمەد سامر زەرگووش قایمقام خانەقین وە جیگری ئەرا ئاژانس شەفەق نیوز وت: ٧٥ موەلیدەی تایبەت لە سوتەمەنی (گاز) بیبەشە، چوینکە بەش پاڵپشتیکریاگ وەپی نەڕەسیە، هەرچەن خەڵکەگەی یە چەن ساڵیگە داوای کەن و پارێزگاریش مووڵەت داگە.
وتیش: ئی کارە وەگەرد بڕیار قەیەغەکردن فرووشتن گاز لە دەیشت ویستگەیل فەرمی تیەێد، ک هەڕەشەی لەکاروسیان ٧٥ موەلیدەی تایبەت کەێد، و قەزاگە کەفێدە تاریکی.
زەرگووش وتیش: بەدی کارەباگە و رەوشەیل کەشوھەوا چارەسەری زوییگ ئەرا خەڵک خانەقین خوازێد هەکاتی ئەو یەکەیل ئیدارەیی و گشت موەلیدەیل لە پارێزگای دیالە.
لەلای خوەییش یاسر بەیاتی وەڕیەوبەر راگەیانن پارێزگای دیالە ئەرا ئاژانس شەفەق نیوز دیاری کرد ک خاوەن ئەو موەلیدەیلە ک لە سوتەمەنی حکومەت بیبەشن مووڵەت فەرمی نەیرن، و باوەتەگە چوودەو ئەرا فەرمانگەی بەرهەمەیل تەفتی، وتیش: پارێزگاگە مووڵەت بەشەوکردن سوتەمەنی ئەرا موەلیدەیل تایبەت داگە.
بەیاتی دووپات کرد ک ئەنجومەن وەزیرەیل وەرین داین مووڵەت ئەرا موەلیدەیل تایبەت واز کرد، و دەسەیل سەرەکی لە پارێزگایل و دەسەیل پەلی لە یەکەیل ئیداری ئەرا هەژمارکردن موەلیدەیل تایبەت دروس کریا، و هەمیش ئەوانەگ مووڵەت فەرمی نەبێت و سوتەمەنی حکومەت نیەوەن.
خەڵک خانەقین دووپات کەن ک زیاتر لە ٢٥ ئاوای زیان لە قەیران کارەبای بیوەرینیگ وەخوەیان دوینن، ک هیشت زیاتر لە ٢٠ هەزار کەس بکەفنە ژیر رحمەت خاوەن موەلیدەیل.