خزر ئەحمەد وەریەوبەر ناحیەی ریاز ئەرا ئاژانس شەفەق نیوز وت: هیزەیل ئەمنی شەهید و زەخمدار ئەرا ئازادکردن ناوچەیلمان پیشکەش کردن، و ئیمەیش ئی قوربانیە ئەرزشدار کەیمن، باوجی سێ ئاوای لە ناحیەی ریاز هەس هیمان هیزەیل پولیس فیدراڵی هانە ناویان، هەرچەن یە چەن ساڵیگە ناحیەگە ئازاد کریاس.
وتیش: پولیس فیدراڵی لەناو ئاوایەیل عفیسە و خێرات و عیون جیگیر بویە، و رازی نییە خەڵکەگە ئەرا میلکان خوەیان گلەو بخوەن، و دووپات کرد کە خەڵک ئی ئاوایلە چەن گلەیگ داوا لە هیزەیل ئەمنی کردن تا ئاوایەیلیان چووڵ بکەن وەلی بیخود.
حەمید وتیش: وەڕیەوبەرایەتی ناحیەگە سکاڵای دادوەری توومار کرد تا باوەتەگە یەکلاوە بکەن، چوینکە خەڵک ئی ئاوایویلە دویای هاتن داعش تیرۆریست و ئۆپراسیۆنەیل سەربازی لەناویان دەرچگن، و تا ئیسە گلەو نەخواردنە.
لەلای خوەییش، مەحمود جبوری یەکیگ لە خەڵک ناحیەی ریاز ئەرا ئاژانس شەفەق نیوز وت: هیزەیل ئەمنی جەنگ وەرانوەر تیرۆر کرد و شکست وەپی هاورد، و خاک عراق ئازاد کرد و شەهيد و زەخمدار پیشکەش کرد، و ئیمە جویر مەشخەڵ و هیمای سەرکەفتن و تەیمانەی نیشتمان وەپیان نووڕیمن.
وتیش: وەلێ یەیش ئەوە نییە کە هیزەیل ئەمنی ئەو سێ ئاوایە چووڵ نەکەن و بیلن خەڵکەیلیان گلەو بخوەن، و ئیمە داوا لە لایەنەیل حکومەتی و ئەمنی کەیمن چارەسەر ئی کارە بکەن.