شەفەق نیوز/ موستەفا کازمی سەرۆک وەزیران فەرماندەی گشتی هێزە چەکدارەگان، ئمڕوو شەممە، دووپاتکرد ک مەرج حکومەتەگە هابان دەزگای دژەتیرۆر وهێزە ئەمنیەگان لە نواگردن هەرکەسیگ هەڕەشەی ئەمن وئارامی کۆمەڵگا بیەێد.

کازمی وەگورەی بەیاننامەی نووسینگەگەی ک رەسیە ئاژانس شەفەق نیوز ، سەردانیگ ئەرا بارەگای دەزگای دژەتیرۆر ئەنجامدا، وفەریق یەکەم روکن عەبدولوەهاب ساعدی وەرپرس دەزگاگە لە پێشوازیی بوی، و کازمی گڕخوارد لەناو بارەگاگە، و نووڕستە بەشەگانی، وناوەندیگ تایبەت وە تووشهاتگەیل ڤایڕۆس کۆڕۆنا کردەو، وهەمیش چەویکەفتە فەرماندەیل دەزگای دژەتیرۆر، وچەودیری کار وپلانە ئەمنیەگانی کرد

وەگورەی بەیاننامەگە، فەرماندەی گشتی هێزە چەکدارەگان، باس لە خوەشحاڵی خوەی کرد لە دیدار ئەندامەیل وئەفسەرەیل دەزگای دژەتیرۆر، ودووپاتکرد ک دەزگاگە جی بڕوایی عراقیەگانە، ئەرا ئەو پاڵەوانەتیەیلە لە جەنگ دژوە چەتەیل داعش تیرۆر کردنە، ورەفتارە مرۆییەگان جەنگاوەرەگانی وەگەرد خەڵک ئەو ناوچەیلە ک لە تیرۆر رزگار بوین، وهەستیان وە ئارامی وەرانوەریان.

وتیش: دەزگای دژەتیرۆر هەمیش ناودیارییگ ناودەوڵەتی وەدەس هاورد، و بایەسە کاربکریەێد ئەرا بتەوکردن ئی ناودیارییە، لە وەردەوامی راهێنان نوو، وگرنگی بتەوکردن بنەمای باوەڕی نشتمانی لە کار دەزگاگە، وهەمیش لەو دەزگاگان.

کازمی ئاماژەدا وە سەختیەگان ک لەی قۆناغە هانە نوای عراق ، و رک حکومەتەگەی لە نواگردنی وشکاننیان، وراسەوکردن فرە لە رەفتارە هەڵەگان، ئەرا وەرەونوا چگن وە وڵاتەگە.

هەمیش داوا لە دەزگای دژەتیرۆر کرد وە فەرماندەو ئەندامەگانی، ئەرا کارکردن ئەرا عراق، وئاماژەدا ک فرە لە هاووڵاتیەگان پەنا وەدەزگاگە بەن، تەنانەت لە کارەیلیگ ئەمنی نیین، وئەیە بەڵگەیگە لە بڕواییان و هەستیان وە ئارامەی وەگەرددان، وبایەسە ئی بڕواییە وەکاربارین ئەرا ئەویگ خەیرە ئەرا وڵاتەگە و گەلەگەی.

کازمی دووپاتکرد ک مەرج حکومەتەگە هابان ئیوە و هابان هێزە ئەمنی ئازاگانمان، لە نواگرن هەرچەگ هەڕەشەی ئەمن وئارامی کۆمەڵگا و تاکەگان بیەێد.