شەفەق نیوز/ پەرلەمانتاریگ تورک ئۆپۆزسیۆن بریا خەسەخانە و خریا ژیر چەودیاری هویرد لە ئەنقەرە، دویای ئەوە لەناو جەنگ و مرافەی ناو پەرلەمان دەسیگ لە سەری دریا، وەگورەی ئاگادارکردن خانمە پەرلەمانتاریگ لە حزبەگەی.
ئیلین جسور خانمە پەرلەمانتار لە حزب خێر وت: دویای ئەوە ک دەسیگ دریا بان سەر حسێن ئورس ک ئەندامە لە خود حزبەگەی ئیلین، لە هووش خوەی چگ.
ئیلین دیاری کرد ک ئورس (٥٨ ساڵە) کەفتیەسە بەش چەودیاری هویرد و تەندروسیی نا جیگرە.
سیمایلیگ وەلایەن میدیایل راگەیانن تورکی بڵاو کریان، نشان دەن ک نوینەر لە ترابزۆن لەبان دەریای سیا لە باکور خوەرهەڵات وڵاتەگە دەسیگ لەلایەن نوینەریگ لە حزب عەدالەت دەسەڵاتدار دریەێدە بان سەری.
ئەو جەنگ و مرافە مەوقەی باسکردن لە بوودجەی ٢٠٢٣ قومیا، و حزبەگەی ئۆردوگان سەرۆک وڵاتەگە تا ئیسە قسەیگ لە باوەت نەکردیە.
کورشات زۆورلو قسەکەر حزب خێر وت: نوینەرمان کەفنە وەر پەلامار سەختیگ، یە رووژ رسواییە ئەرا پەرلەمان تورکیا و ئەرا گشت ئەوانەگ ئی پەلامارە کردن.
هەمیشە گفتوگۆ و قسە لەناو پەرلەمان تورکیا وەردەوەردە لەناوی بوود، و هاتێ برەسێدە جەنگ و مرافە و گورمیچە.