شەفەق نیوز/ چالاکوانەیل و سەرچەوەیلیگ حزبی لە مەنەلی، دووپات کردن ک نشانەیلیگ لە وازهاورردن کورد لە هەڵبژاردن پەرلەمانی زوینە هەس، لەوەر پشتگوشخستن سیاسی ئەرا شارەگە، و تەعریبکردن ( وه عه‌رو كردن) و گوماکردن شناسنامەی مێژوویی.
چالاکوان موڕاد عەلی مەندلاوی ئەرا ئاژانس شەفەق نیوز وت: دابەشکرن بازنەێ هەڵبژاردەکان سەر کوردەیل بڕید و دویاترین ئومیدیان وە نۆێنەرایەتی پەرلەمانی ودەسکردن وە بەرنامەیگ سیاسی و کۆمەڵایەتی ئەرا هاوردنەوەی شارەگە جوور قەزایگ و هاندان هاتنەوەی ئاوارەیل و وەزوور بارکریایەیل لە کوردەیل وەدریژایی ساڵەیل گوزەیشتە چویچان.
مەندلاوی وت؛ دانان مەنەلی لەناو بازنەیگ هەڵبژاردن وەگەرد بەلەدرووز و موقدادیە گورز ئاشکرایگە ئەرا پێکهاتەی کورد لە مەنەلی و قەزانیە، و پیلانیگ بەرنامەدارە ئەرا تەعریبکردن شارەگە و ئاڵشتکردن دیموگرافیا دریژ ماوەیگە، و ئاماژە کرد ک نشانەیل وازهاوردن لە هەڵبژاردن لە مەنەلی بویە ئاشکرا و راسی، لەوەر پشتگوشخستن و دویرەوخستن.
حزب یەکێتی نیشتمانی کوردستان، هیچ کاندیدیک لە مەنەلی ئەرا هەڵبژاردن زوینەی هاتگ لە رووژ دەی تەشرین یەکەم ئایندە نەخستە وەردەس، وەگورەی قسه‌ی یەکیگ لە ئەندامەکانی ک وت: هووکارەگەی لەوەر رەوشەیل نا ئارام لەناو ناحیەگە و هەسی کۆمەڵە چەکدارەیلیگ لەناوی ك چەن ساڵیگه تەقەلایلیگ ئەرا لەناوبردن و سڕەوکردن دەسەڵات کوردی ده‌ن.
وەرپرسە کوردەگە لە قسەیلی ئەرا ئاژانس شەفەق نیوز باس رەوش مەنەلی لە ناو بازنەی هەڵبژاردن موقدادیە و بەلەدرووز کرد ک خوەی ئامانجکردنە ئەرا پێکهاتەی کورد و هەسی وتەواوکردن زنجیرەی ئاڵشتکردن دیموگرافیا و بارکردن کورد و وه‌عه‌ره‌و کردن مەنەلی وە شیوەیگ ره‌سمی و فەرمی.
وەرپرسەگە داوا لە سەرکردە کوردەکان کرد گرنگییگ نیشتمانی بیەنە شار مەنەلی و مەقیەتی شناسنامەی نەتەوەیی بکەن ک لەوەر پشتگوشخستن خزمەتگوزاری و سیاسی گوما بوی.
لەلای خوەییش جەلیل ئیبراهیم دەلو ئەندام پارت دیموکرات کوردستان ئەرا ئاژانس شەفەق نیوز ئاشکرای هەسی کاندیدیگ ئەرا هەڵبژاردن پەرلەمانی لە مەنەلی و بازنەی موقدادیە و بەلەدرووز کرد، و دیاری کرد ک بازنەی هەڵبژاردن خانەقین و دەورگردی خوەی ویستگەی سەرکیە ئەرا کورد لە هەڵبژاردن پەرلەمانی.
دەلو لە قسەیلی ئەرا ئاژانس شەفەق نیوز وت: دەنگەیل کورد لە مەنەلی لە ٢٥٠٠ تا ٣٠٠٠ دەنگ زیاتر نییە، لەوەر کۆچكردن ٧٠٪ لە مه‌ردم و پێکهاتە کوردەگە وەرەو بەغداد و کوردستان وناوچەیلیگ تر، و ئاماژە کرد ک پشتگوشخستن خزمەتگوزاری لەلایەن حکومەتەیل لە شوون یەک مەنەلی لە قەزایگ مێژووی و ناحیەیگ ستراتیژی کردە ئاواییگ نیمچە ویران.
هەمیش وت؛ هەرچەن هێزە کوردییەکان تەقەلایلیگ ئەرا هاوردنەوەی ئاوارە و بارکریایەیل ئەرا مەنەلی دان، بەڵکم فرەی ئەوانەگ هاتنەو، لەوەر رەوشە خزمەتگوزارییە خراوەکان لە ناحیەگە وکەمەوبوین ژمارەی کوردەیل دووارە دەرچگن.