کەنعان موڕاد/ وەی رووژە ک رووژ زوان داڵگیە، شار خانەقین کەفتیەسە دەسپاچەی ئی باوەتە، ک خەڵک شارەگە خوەشیان لە زوان داڵگییان هات، و دویای رزگارکردن شارەگە لە دەس رژیم سەدام، و ئومید قورتاربوین لە تەعریب، و گوماکردن هەس نەتەوەیی لەلای مەردمی، دەسەڵاتەیل هەرێم کوردستان، ئەوە لە هویریان نەچگ، ک وە کوتپڕ مەکتەوەیل زوان کوردی وازن کردن، و مەردمیش مناڵەیلیان خستنە ناو ئەو مەکتەوەیلە، هەرچەن شیوەزار خەڵک خانەقین شیوەزار کورد فەیلیە، و کەم لەلیان شیوەزار سۆرانی زانن، ک داڵگ و باوگەیل، لە سورەمەیری و ئەرکەوازی و قەڵەوڵس و ئەو هووز و ئێڵەیل، لە هەیوەت دووسی نەتەوە، و ئومید گەورەیان وە کوردایەتی، مناڵەیلیان خستنە مەکتەو کوردی -سۆرانی.

 تا شمارەی مەکتەوەبل زوان کوردی لە خانەقین فرەترەو بوین، و مەکتەوەیل زوان عەرەوەی بوینە نزیکەی تەنیا شەش مەکتەو لە شارەگە، و شمارەی خوەنەوارەیل زوان کوردی رەسیە فرە زیایەو بوبن، هەڵبەت شمارەی مامووستایل کوردییش زیای بوین. 

یەکەم کار ک بیئومید خەڵکەگە کرد، ئەوە بوی ک مامووستایل زوان کوردی لەناو خانەقین هیمان وە ئاست مامووستایل هەرێم کوردستان نیین، و پرسیارەیل تاقیکرەوەی شەش سەرەتایی لە بانەوە هات، ک پرسیارەگە وە ئاست بان بوی، و خوەنەواری وە ئاست خوار بوی، لەبان ئەوە، بڕیگ لە خوەنەوارە زیرەکەیلیش، ساڵیگ لە خوەنەواری دووارەو کردن، چمای ساڵیگ لە تەمەنیان، کردنە قوربانی ئەرا کوردایەتی و زوان کوردی.

 ئیجا، هەنای ئەو مناڵەیلە لە ئامادەیی تەواو کردن، و رەسینە زانکۆ، کەفتنە وەر دووچەوەکی لەلایەن وەرگردن لە زانکۆ و پەیمانگایل هەرێم کوردستان، ک زانکوەیل پەڵپ پلەیگ بەرزتر لە خوەنەوار خانەقین گردن.

ئیجا، ئەوەگ لە زانکۆ و پەیمانگایل هەرێم کوردستان دەرچگ، شوینیگ لەناو دامودەزگایل هەرێم ئەرای نییە، چوینکە خەڵک خانەقینە.

ئیجا، وەرپرسەیلیگ کورد لەناو خانەقین، مناڵەیل خوەیان خستنە مەکتەوەیل زوان عەرەوەی.

لەبان ئەو هەمکەی بیئومیدیە، مەردم شار خانەقین، هەر لەبان خوەنەواری کوردی مەنن، ک بایەتە ئی کارە لەناو کتاوەیل میژوو و کۆمەڵگا بنویسیەێد، جویر چشتیگ جی شانازی گەورەیگە، و رەفتار دەگمەنیگ وەلایەن مەردمیگ خوەشیان لە نەتەوەی خوەیان تیەێد، و جویر قوربانییگ، شایەت هویچیگ لە پیشکەشکردن خوین کەمتر نەوود، ک دویاڕووژ و چارەنویس نەوەیل خوەیان کردنە قوربانی وەی زوانە.

لەبان ئەوەیش، هەنای بانگواز ئەرا ریفراندۆم سەروەخوەی کوردستان کریا، خەڵک خانەقین، جویر رووژ نەورووز، کەسیگ لەبن ماڵ خوەی نەمەن، ک گشتیان وە روی خەنە، و کلگ کەو، شانازی وەو دەنگدانە کردن ک ئەرا سەروەخوەیی دان.

ئیجا، بیئومیدی بویە رەنگ شارەگە، ک دەسیان لە سەروەخوەیی بڕیا، و هەمیش لە هەرێم کوردستان، و هەمیش لە مەکتەوەیل زوان کوردی.

لەناو پانێڵ فرە گەرمیگ، جویر هەڵهەڵە و دهوڵ شوین شەهیدەیل، بڕیگ لە مامووستا و رووشنهویرەیل شار خانەقین، لەناو چایخانەی کەلتوری میلکان، باس زوان کوردی، و خوەنەواری کوردی لە خانەقین کردن.

گلەیی خریا بان دەسەڵاتەیل هەرێم کوردستان زیاتر لە لایەنیگتر، وەلی کەسیگ لەوە پەشیمان نەویە ک کوردی خوەنست، و مناڵی خستە ناو مەکتەو کوردی.

و کەسیگیش پەشیمان نیەوود، ک وە گشت دڵسووزییگ قوربانی وە نەتەوەی خوەی پیشکەش کرد.