شەفەق نیوز/ ناودیارترین روومانویس لە ئیسپانیا لە ماوەی نیم سەدەی گوزەشتە، خافێر ماریاس، لە تەمەن ٧٠ ساڵان دویاکووچی کرد.

وەگورەی ئاژانس خەوەری ئیسپانیا "ئی ئێف ئی"  خافێر ماریاس دویای پەتایگ لە سویەی، لەناو خەسەخانە گیانی لەدەسدا.

ماریاس زیاتر لە ١٥ روومان نویساگە، و بڕیگ لە وتار ئەرا رووژنامەی هەفتانە ئەڵگەردان کریانە، و ناودیارترین روومانەیلی: "کورازون تان بلانکۆ"  (دڵیگ فرە چەرمگ) و "توداس لاس ئەلماس" (گشت گیانەیل)، و "مانانا ئین لا باتالا بینسا ئین می" (هویر وە سوو لە مەوقەی جەنگ بکە).

بڕیگ لە کارەیلی ئەرا زوان ئینگلیزی وچەن زوانیگتر ئەڵگەردان کریاگە.

ماریاس چەن ساڵیگ کاندید ئیسپانیا بوی ئەرا خەڵات نۆبل ئەرا ئەدەب، هەر لەو مەوقە ک کامیلۆ خوسێە لە ساڵ ١٩٨٩ بویە خاوەن ئەو خەڵاتە.

بیدرۆ شانسیز سەرۆک وەزیرەیل ئیسپانیا لەبان تویتەر نویسان: ئمڕوو خەفەتیگە ئەرا ئەدەب ئیسپانیا، ک خافێر ماریاس یەکیگ لە مەزنترین نویسەرەیل سەردەممان ئی جەهانە هیشتە جی، ئەوەسا ئەو بڕ گەپە لە کارەیلی بوونە بنەمایگ لە بەهرەی ئەدەب ئیسپانی.