شەفەق نیوز/ دۊەمین فێستیڤاڵ فیلم کوردی ئیستانبوڵ وە نیشاندان فیلم ''کوردێن ئێزدی'' دەسوەپی کرد ک ئەو فیلمە لە ساڵ 1933 لە ئاواییگ کوردان لە وڵات ئەرمینیا بەرهەم هاتگە.

ئەو فێستیڤاڵە 28 فیلم درۊژ و کوڵەفیلم و بەڵگەفیلم گردێدە خوەی ک باس کولتوور، مێژوو و وەسەرهاتەیل کورد کەن و شمارەی فرەیگ لە سینەماکار و دەرهێنەر لە چوارپارچەی کوردستان لەناوی بەشدارن و ئەوەیش گرنگی سینەما لە ناوەت کولتوور و زوان کوردی نشان دەێد. 

لەوەر ئەوە ک پۆلیس تورکیا لە وەخت ئاهەنگ نەوروز لە ئامەد (دیاربەکر) پووشین دڵنگ کوردیی قەیەغە کردۊد، ئامادەکارەیل و بەش فرەی بەشدارەیل فێستیڤاڵ فیلم کوردی ئیستانبوڵ وە پووشین دڵنگ کوردی دژ ئەو بڕیارە وسیان.   

لە یەکەم رووژ فێستڤاڵەگە فیلم ''کوردێن ئێزدی'' نشان دریا ک لە ئاواییگ کورد لە ئەرمینیا بەرهەم هاتیە و باس دژایەتیی شێخ و ئاغا لەبان پەروەردە و ژیان ژنەیل و گرنگی خوەنەواری کەێد.

شمارەی فرەیگ لە سینەماکار، دەرهێنەر و ئەکتەر لە خوەرهەڵات، خوەرئاوا، باشوور و باکوور کوردستان لە فێستیڤاڵەگە بەشدارن.