شەفەق نیوز/ تۆێژەرەیلیگ لە کۆمپانیای "تول فری فۆروردینگ" ئەمریکی، نموونەیگ وە کومپیوتەر وەناو "میندی" دروس کردن، تا شیوەی لەشمان لە ساڵ ٣٠٠٠ زاینی نشان بەێد، ئەوەیش دویای وەکارهاوردن تەکنیکی فرەیگ.
توێژەرەیل وتن: وەکارهاوردن مۆبایل ئەرا ساعەتەیل درویژیگ، هاتێ لە بانان پشتیان بچەمنێد، و فرە نووڕستن وە شاشەی مۆبایل هیلێد سەرمان وەرەو بچەمێد، وەگورەی بڵاوکردن تووڕ ئیرەم.
دەسەیلمانیش شایەت جویر چنگیر وەپیان باێد، لەدویای وەدەسگردن مۆبایل لە گشت وەختەگە، و ملمانیش قەویترەو بووش، و باڵمان بوودە سویکیگ وەپلەی ٩٠.
نموونەگە مەزەنە کرد ک مەغزمان بویچگترەو بوود، و کەپووڵمان قەویتر، و پێڵگ چەومان قویلترەو بوود.
کۆمپانیاگە وتیش: سەرچەوەیلیگ زانستی و ئەزمونەیل تۆێژەرەیل هاوردیمن، وەرجەیەگ کار لەبان دیزایەن سری دی ئەرا شیوەی ئایەم لە بانان بکەیمن، ک لە دویای وەکارهاوردن مۆبایل و ئایپاد چە وەپی تیەێد، وەگورەی دەیلی مەیل.
دکتۆر نیکۆلا جۆردجیفگ، ک لە تۆێژینەوەگە بەشداری نەکردیە، وت: شیوەی گردن ئایباد و مۆبایلمان زوور لەبان خاڵەیلیگ لە لەشمان تیارێد، ک لەشمان کەێسە شیوەی کەوان و چەمیەو کەێد.
وتیش: شایەت گردن ئامێرەیلمان بیلێد دەمار پشت بەلەمرک درویژەو بوود، و زوور فرەیگ بارێدە بانێ، هەمیش دەمارەیل ملمان کوڵفتەو بوون، و شایەت ژان وەردەوامیگ لە دەمار ملمان پەیا بکەێد.
وەرجەیە، تۆێژەرەیلیگ نموونەی "ئیما" دروس کردن، ک شیوی ئایەم لە ئەنجام رەوشەیل کار نشان دەێد، و نموونەگە دویای ئەوە دروس کردن ک چاویان کەفتە ٣ هەزار فەرمانبەر لەباوەتەیلیگ تەندروسی و کۆمەڵایەتی لەناو کاریان.
شیوەی "ئیما" هەکاتی ئی نموونەی نووە بوی، وە پشتیگ هەمیشە چەمیاگ، و چەو سوور و هشک لەوەر ئەوە ک هەمیشە کەفێدە نوای شاشەی کۆمپیوتەر، و چەرم هشکیگ لەوەر رووشنایی دەسکرت.