زاڕووەیل و گەورەیل کەفنە وەر گەزین سەگ، کە کویچە و ناوچەیل کەرکوک گردنە، و هاتێ خاسترین بەڵگە ئەوە بوود کە شەو دووشەممەی گوزەشتە لە دوو رویداو جیاجیا ١٣ هاوڵاتی مەدەنی سەگ کەزیەسەیان،  و کەسیگیش وەرجە چەن رووژیگ لە ئەنجام گەزین سەگ گیانی لەدەسدا، کە نشانەیگە لەبان ئەو رخ گەورە کە سەگەیل وەرەلا دروسی کەن.

 بڕبڕ لە سەگەیل دڕ     

کتبریگ خەڵک شار کەرکوک وەناو سەردار خالد، ئەرا ئاژانس شەفەق نیوز وت: دیاردەی گەزین سەگ دیاردەیگ رخبەرە، و لەناو بەش فرەیگ  لە  گەڕەکەیل چویچیانە، و هویچ ریکرییگ لەنوای ئەو سەگە دڕەیلە نییە.

 خالد لە لە قسەیلی وتیش: ئیمە وەدەس ئی سەگەیلە بیزار بویمنە کە لەس ناوە چویچیانە،  و بڕیڕ لەلییان  هانە ناو کویچەیل، کە پەلامار چەن مناڵیگ دانە، و چەن مناڵیگ گەزینە، کە کەسیگ ویرە نەیرێد بچوودە دەیشت چشتیگ بسینێد، و نزیکەی سێ کەس زەخمدار بوینە.

 خالد وتیش:  سکاڵا لەلای بەش ڤێتێرنەری کەرکوک کردنە کە تایبەتە وە نواگیریکردن ئەو سەگەیلە، کە رخ و بیماری تیەرن، بەڵام وتن کە فیشەک لەناوبردن سەگ نەیرن و شوینیگیش نەیرن تا سەگەیل ئەرای بوەن.

لەلای خوەییش؛ وەڕێوەبەر شارەوانی کەرکوک، ئەندازیار ئەحمەد عومەر، ئەرا ئاژانس شەفەق نیوز وت: “وەڕێوەبەرایەتی شارەوانی کەرکوک، وە هاوکاری سەرۆک شارەوانی کەرکوک، دەسکردە هەڵمەتیگ ئەرا لەناوبردن ئەو سەگەیل دڕە کە لە کەرکوک بڵاو  بوینە، و تەنیا تیمەیلمان ئەو سەگەیلە لاوەن کە مەفرەزەیگ تایبەت تووپنیدەیان”.

وتیش: "شارەوانی کەرکوک کار کەێد تا  کەرکوک وەشیوەیگ رەنگین نشان بەێد و هەر گیچەڵیگ کە زیان وە هاوڵاتەیل کەرکوک و گشت گەڕەکەیل بڕەسنێد نیەیلێدەی".

 ئامار تەندروسی

 سامان عەلی قسەکەر فەرمانگەی تەندروسی کەرکوک ئەرا ئاژانس شەفەق نیوز وت: ل چەن رووژ گوزەشتە زیاتر لە 13 گەزین سەگ دڕ توومار کردیمنە، کە پەلامار مەردم مەدەنی لە گەڕەک شۆرجە و رەحیم ئاوا دانە، لە ئەنجامی 13 هاووڵاتیی مەدەنی زەخمدار بوین کە ئەرا خەسەخانەی ئازادی  کەرکوک بریان”.

  وتیش " چەن رووژیگیش وەرجەیە سەگ وەرەلا پەلامار کەسیگ مەدەنی دان و گەزینەی، دویای چەن ساعەتیگ پیاوەگە گیانی لەدەسدا".

 لەناوبردن سەگ

 سەرۆک دەسەی دژە سەگ بیخاوەن و سەرۆک شارەوانی کەرکوک، فەلاح خەلیل یاجیلی، ئەرا ئاژانس شەفەق نیوز وت: دەسەگە زانیاری لەبان سەگەیل وەرەلا وبڵاەبوینیان لە کەرکوک وەرگرد، ئمڕوویش دەسکردیمنە هەڵمەتێگ ئەرا لەناوبردن سەگ وەرەلا لە گشت ئەو ناوچەیلە کە لەناوی چویچیانە، کە دەرکەفت شمارەیان زیای کردگە، هەرچەن دەیان لە سەگەیل ئەرا شوینیگ تایبەت وا سەگ بریانە، کە ئەو شوینە وەرجە چەن مانگیگ  دامەزریاس.