شەفەق نیوز/ میدیایلیگ راگەیانن ئەمریکی، باس ئەوە کردن ک بەشیگ لە مەردمە باڵا کوڵەیل، پەنا وە نەشتەرگەری بەن تا چەن سانتیمەتریگ لە باڵایان درویژەو بوود.

وەگورەی پزشکیگ نەشتەرگەری لە شال لاس فیگاس ئەمریکا، نەشتەرگەری دروژیکردن قول توەنێد لە ٧ تا ١٥ سانتیمەتر باڵای ئایەم درویژەو بکەێد.

چوینکە ئی نەشتەرگەریە فرە گرانە، پسپۆڕەیلیگ لە کۆمپانیایل تەکنیکی، جویر گووگڵ و میتا و ئەمازۆن و مایکرۆسۆفت بوینە زاقترین کڕیارەیل ئی چینە لە نەشتەرگەری ک خەرجەگەی رەسێدە ٧٥ هەزار تا ١٥٠ هەزار دۆلار.

کێڤن ديبيبارشاد لە ساڵ ٢٠١٦ پەیمانگای (LimbplastX) دروس کرد، و کارەیل نوڕینگەچدی لەمەوقەی پەتای کۆرۆنا گەشە کرد، و دیاری کرد ک فرە لە بیمارەیلی لە کەرت تەکنەلۆژیا کار کەن.

ديبيبارشاد ئاشکرا کرد ک ئەوانەگ لەلای نەشتەرگەری کەن گشتیان دەوڵەمەنن، لەلیان سەرۆکەیل جیوەجیکردن و ئەکتەرەیل و فەرمانبەرەیل لە کەرت دارایی.

وەگورەی پسپۆڕەیل، ئەو شیوە ک پیاوەیل ئەوسا وەپی نووڕیانە نەشتەرگەری جوانکاری لەی ساڵەیل دویاییە نەما، ک نەشتەرگەری ئەرا پیاوەیل لەناوبەین ساڵ ١٩٩٧ تا ٢٠١٥ وەئاست ٣٢٥% بەرزەو بویە.

وەلێ دامەزرینر پەیمانگای "لێم پلاست ئێکس" وت: تەمەی وەرزشوانەیل وەی نەشتەرگەریە نیەکەم، چوینکە لە توانایل وەرزشکردنیان کەمەو کەێد.

وەگورەی قسەی پسپۆڕەیل لەی نەشتەرگەریە، پزشکەگە سوخان ران شکنێد، و مێخ خەێدە ناوی، و هەر رووژیگ ناوبەین هەردوگلای شکیانەگە درویژەو کەن، تا ماوەی چەن مانگیگ تا وتەواوی خاسەو بوود.