کتاوەگە ئی چشتەیلە ها ناوی: 

پرسیار لە گەورە تەمەنەیل وەرجە مردنیان کریا لەو چشتەیلە کردنە و لەی پەشیمانن یا پەشیمانن چوینکە ئەو چشتە نەکردنە.

لە ئەو گەورە تەمەنەیلە ئی پەنج ئارەزووە لەناو  قسەیلیان بوی:

یەکەم: خوەزگا ویرەیگ بیاشتام کە ئەرا خوەم بژیاتام، نەگ ئەو ژیانە کە مەردم چەوەڕیی کەن یا مەردم خوازن،  کە فرەیان پەشیمانی خوەیان نشان دان چوینکە کار کردنە تا رازی کەسەیلیگ ترەک بکەن، یا وەشیوەیگ دیار بیەن تا مەردم لەلیان رازی بوون.

دویەم: خوەزگا وەختیگ فرەترە بیاتامە خانەوادە و برادەرەیلم  لەجیای ئەوەگ تەمەن لەناو رۆتین کار مەینەتی لەدەس چگ.

سێیەم: خوەزگا ویرەیگ بیاشتام وە ئاشکرا ئەوەگ هاناو دڵم نەشاریامەو تا کەسیگ دڵگران نەکەم، یا قوربانی بیەم ئەرا کەسەیلیگ شایستەی نیین.

چوارەم: خوەزگا وەگەرد برادەرە کوێنەیلم هامشوو بکردیام و برادەری وەردیان نووەو بکردیام، چوینکە برادەرە کوێنەیل لە گشت برادەرەیل ترەک جیاوازن کە وەگەرد ئەوان خوەشاڵەو بویمن و یاد مناڵی رەنگین تیەرێمنەو، وەلێ وەداخەو لە وەخت کار و خیزان لەلیان دویرەو کەفیمن، تا یەکجاری لەدەسمان چن یا وەناکاوەو چاو مردنیان ژنەفیمن.

پەنجەم: خوەزگا زویتر مانای راسی خوەشی بزانستام، کە فرە لەلیمان تا بوودە دیریگ ئیجا زانن کە خوەشی چشتیگە لەناو دڵ، و کاریگ وە پویل و پۆست و ناوبانگی نەیرێد، کە خوەشی چشتیگە کە توەنستیمم وە رەنجیگ کەمتر و خەرجیگ ئاسانتر وەدەس باریمن، وەلێ هەر جویر هویرکردن جارانی وەپی نووڕیمن.