حەسەن تاڵەبانی وەڕیەوبەر پەروەردەی خانەقین سەروە هەرێم کوردستان ئەرا ئاژانس شەفەق نیوز وت: لە بنەمای رینمایل وەزارەت پەروەردە لە هەرێم کوردستان، ئمڕوو وەریەوبەرایەتیەگە ئاهەنگ رووژ ئاڵای کوردستان کرد، ک ئاهەنگ و چالاکییەیل لەناوی بوین هەرلە یەکەم ساعەتەیل دەوام شەوەکیان و نیمەڕوان دەسوەپی کرد، و پەرچەم کوردستان لە مەکتەوەیل بەرزەو کریا.
تاڵەبانی وتیش: ٢٩ مەکتەو لە سەرەتایی و ئامادەیی وە گەرد سازە و پەیمانگایل حکومەتی و تایبەت کەرنەڤاڵ ئاهەنگ رووژ ئاڵای کوردستانی کردن، لەناو کەشوهەوای پەروەردەیی کونجیاگ وەگەرد تاقیکردنەوەی نیمەی ساڵ ک لە چوار ئی مانگە دەسوەپی کرد.
لەلای خوەییش، ئەزهار موزەفەر وەڕیەوبەر ماڵ روشنهویری مناڵەیل لە خانەقین وت: فەرمانگەگەی لە ئاهەنگ رووژ ئاڵای کوردستان وە چالاکییەیل جیاوازیگ لە مەکتەوە «تشرو» لە خانەقین ئەنجام دریا، وە ئامادەبوین کەسوکارەیل حکومەتی و پەروەردەیی و روشنهویری لە گشت چینەیل کۆمەڵگا.
ئەزهار خان ئەرا ئاژانس شەفەق نیوز وتیش: چالاکییەیل سروود و شانۆگەری و چالاکییەیل هەمەڕەمگ لەناوی بوی وە بوونەی رووژ ئاڵای کوردستان ک کەفێدە ١٧ی کانوون یەکەم لە گشت ساڵیگ، وتیش: رووژ ئاڵای کوردستان بوونیگ نیشتمانی گرنگە لە گشت ناوچەیل هەرێم کوردستان و لە گشت پارێزگایل.
لە پارێزگای دهۆک، هەمیش ئاهەنگ رووژ ئاڵای کوردستان کریا، ک پەیامنێر ئاژانس شەفەق نیوز وت: لە پارک بارزانی لەناو شارەگە ئاهەنگەگە ساز کریا، و شمارەی گەورەیگ لە هاووڵاتی و وەرپرسەیل ناوخوەیی لەناوی ئامادە بوین، ک پەرچەم کوردستان لەناوڕاس پارکەگە بەرزەو کریا.