شەفەق نیوز/ دەیان لە خوەنەوارەیل زانکۆی سلێمانی، ئمڕوو دووشەممە، لە وەردەم بینای سەرۆکایەتی زانکۆگە وەداوای دەرماڵە ناڕەزایی کردن.
پەیامنێر ئاژانس شەفەق نيوز وت: ناڕەزاییەیل ری ناوبەین سلێمانی و کەرکوک لە هاتن و چگن بڕین، و دەوام لە هۆڵەیل خوەنستن وسانن.
خانمە خوەنەوار شەرمین عەلی ئەرا ئاژانس شەفەق نیوز وت: خوەینیشاندەگە لەوەر ئەوە هات ک حکومەت پەیمان پارەکەی وە خەرجکردن دەرماڵە وە مانگانە جیوەجی نەکرد.
وتیش: لە مانگ حوزەیران تا ئیسە دەرماڵە خەرج نەکریا و یەیش وەپیچەوانەی ئەو پەیمانەیلەس ک وەپیمان دانە، و دووپات کرد ک ئەوەسا لە خوەینشاندان وەردەوام بویمن تا داوایلمان جیوەجی بکەن، هەمیش داوا کەیمن خوەنەوارەیل ئیوارانیش وەی دەرماڵە گشتگیر بوون.
هەرلیوا، لە مانگ تەشرین دویەم لە ساڵ گوزەشتە، بڕیگ لە خوەنەوارەیل زانکۆی سلێمانی وەداوای خەرجکردن دەرماڵەی خوەنوار کۆلێژ و پەیمانگایل ناڕەزایی کردن، و حکومەت هەرێم کوردستان پەیمان وە خەرجکردنی دا، ک رەسێدە ٦٠ هەزار دینار ئەرا خوەنەوارەیل قەزا و ناحیەیل، و ٤٠ هەزار دینار ئەرا خوەنەوارەیل ناوەند پارێزگایل.