شەفەق نیوز/ حکومەت هەرێم کوردستان، ئمڕوو دووشەممە، بەیاننامەیگ دەرکرد، وە زبرترین وشەیل نەفرەت ئەو پەلامارە لەناوی کرد ک ئیران وە مووشەک و فڕۆکەیل بێفڕۆکەوان لە هەرێم کوردستان جیوەجیی کرد.

بەیاننامەگە وت: وە زبرتین وشەیل نەفرەت لەو پەلامارە کەیمن ک کۆمار ئیسلامی ئیران، دویەشەو، لەبان هەرێم کوردستان جیوەجیی کرد، ئەو دەسدرویژی ئیرانی دووارەبویە ک سەروەری عراق و هەرێم کوردستان شکنێد دەسپیچگ نەیرێد، و پێشێلکردن زاقیگ وەبان رسوومەیل ناودەوڵەتی و پەیوەندیەیل هاوسا خاسیە.

وتیش: لەوەختیگ داوا لە ئیران کەیمن ئی هەڵمەتە دژوە هەرێم کوردستان بووسنێد، ئیمە دووپات کەیمن ک قەت وە تونەڕەوی ئارامی نیەڕەسێدە ئەنجام، هەمیش حکومەت هەرێم کوردستان داوا لە برادەر و هاوبەشەیلی لە بەغداد و نەتەوە یەکگرتگەیل و کۆمەڵگای ناودەوڵەتی وەگشتی کەێد هەڵویست ئاشکرا و روونیگ وەرانوەر پەلامارەیل وەردەوام ئیران بیاشتوون.