سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە ناو دیداریگ وە ئامادەبوین هەردوگ جیگر سەرۆک هەرێم، وەرپرس بەش پەیوەندییەیل دەیشت هەرێم کوردستان، و نوێنەر حکومەت هەرێم کوردستان لە نەمسا، باس لە پەیوەندییەیل نەمسا وەگەرد عراق و هەرێم کوردستان، پەیوەندییەیل ناوەین هەولێر و بەغدا و کووچبردن نایاسایی وەرەو ئەوروپا و دویاترین پیشهاتەیل رەوش ناوچەگە وە گشتی کریا.
نێچیروان بارزانی بیجگە لە دەسنشانکردن وە پەیوەندییە درویژماوەیل ناوەین هەردوگلا و ئافەرین لە پاڵپشتی نەمسا ئەرا هەرێم کوردستان و وەردەوامیی گەشتە ڕاستەوخۆەیل ناوەین ڤیەننا و هەولێر کرد، پیروززبایی لە ئاراستەی وەزیری دەیشت نەمسا کرد زە بوونەی وازکردن باڵیۆزخانەی وڵاتەگەی لە بەغدا و داوا کرد نوێنەرایەتی نەمسا لە هەرێم کوردستان واز بکەێد، بەڕێزبیش ئامادەیی هەرێم کوردستانی دووارەو کرد ئەرا پتەوکردن پەیوەندییەیلی وەگەرد نەمسا لە گشت چینەیل.
لای خوەییش وەزیر دەیشت نەمسا دووپات کرد کە وڵاتەگەی وە گرنگییەو نووڕێدە پەیوەندییەیلی وەرد عراق و هەرێم کوردستان، و کار ئەرا وازکردن نوێنەرایەتی لە هەولێر کەن، دووپاتیش کرد کە کەرت تایبەت نەمسا خوازێد بەرهەمهاوردن لە کوردستان بکەێد.
لەو چوارچیوە هەردوگلا هاوڕابوین لەبان ئەوە کە ئارامی سیاسی و ئاسایش فاکتەریگ گرنگە ئەرا کیشانن سەرمایەی دەیشتەکی و پێشکەفتن ئابووری.
لەباوەت کووچبەری نایاسایی، هەردوگلا دووپات لەوە کردن کە رویوەڕویبوین کووچ نایاسایی هەماهەنگی فرەلایەنە لە ناوەین وڵاتەیل ئەوروپا و ناوچەگە خوازێد.
لەباوەت گیچەڵەیل هەولێر و بەغدا، سەرۆک نێچیروان بارزانی دووپات لەوە کرد که بایەسە گیچەڵەیل لە بنەمای دەستوور چاره بکریەن و سیستەمی فیدراڵی وەتەواوی جبگیر بکریەێد، دیالۆگیگ بنیاتنەر هەس لە بنەمای لەیەکفامستن هاوبەش ئەرا رەسین وە چارەسەر و زاڵبوین لەبان گرفتەیل.
هەرولیوا دووپاتیش لە پەیوەندیی خاس هاوسایەیی وەگەرد وڵاتەیل هاوسا و مقیەتیکردن بەرژەوەنی هاوبەش کرد.
وەگورەی بەیاننامەی سەرۆکایەتی هەرێم، بڕیگ پرس بەرژەوەنی هاوبەشلەناو باسەیل ئەو دیدارە بوین.