سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە گردەوبوین ناوەین نێچیروان بارزانی، سەرۆک هەرێم کوردستان، و جینین پلاسخارت، نوێنەر تایبەت سکرتێر گشتی نەتەوە یەکگرتگەیل لە عراق، باس لە رەوشەیل سیاسی و ئەمنی و هەڵوژاردن ئەنجومەن پارێزگایل عراق و پەیوەندیەیل هەولێر- بەغدا کریا.
بەیانامەگە وتیش: هەردوگلا هاوڕا بوین لەبان گرنگی وەڕێوەبردن و سەرخستن پرۆسەی دەنگدان لە هەڵوژاردن ئەنجومەن پارێزگایل لە عراق، هەرلیوا زوور لە گرنگی مقیەتیکردن ئاسایش پرۆسەگە کریا تا لە کەش بیوەی و ئارام ئەنجام بدریەێد، وەتایبەتی لەو بوارەیلە کە مادەی ١٤٠ دەستوور هەمیشەیی عراق گرێدەو.
لە بەیاننامەگە هاتیە؛ لەباوەت پەیوەندییەیل ناوەین هەولێر و بەغدا، هەردوگلا وە شیوەیگ ئەرێنی هەڵسەنگاندن لە هەوڵ و تەقەلای محمد شیاع سودانی، سەرۆکوەزیرەیل عراق کردن، و ئومیدیان نشان دان ئەرا پتەوکردن پەیوەندییەیل ناوەین حکومەت فیدراڵی و حکومەت هەرێم کوردستان لە قۆناغ ئی ماوە و قۆناغ ئایندە، و چارەسەرکردن گیچەڵە گیرهاتگەیل ناوەین هەردوگلا لە بنەمای دەستوور.
وەگورەی بەیاننامەگەر دویاترین پیشهاتەیل رەوش ئاڵۆزی خوەرهەڵات ناوڕاس و کاردانەوەیلی، باسیگ ترەک ناو دیدارەگە بوی.