شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، چارەکردن گرفتەیل گیرهاتگ ناوبەین بەغداد و هەولێر جویر کلیلیگ ئەرا ئاسایش و ئارامی لە عراق دانا، لە وەختیگ سوپاسی ئەرا سەرۆک فەرەنسا ئیمانوێل ماکرۆن پیشکەش کرد ئەرا پاڵپشتیکردن عراق.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: نێچیروان بارزانی سەرۆک هەرێم کوردستان، نیمەڕو ئمڕوو، پیشوازی لە کریستیان کامبون سەرۆک دەسەی پەیوەندیەیل دەیشتەکی و وەرگری و هیزەیل چەکدار لە ئەنجومەن پیرەیل فەڕەنسی (سینات) و شاندیگ یاوەری کرد، و دیاری کرد ک هەردوگ لایەنەگە لە دیدارەگە باس پەیوەندیەیل هەرێم کوردستان و عراق وەرد فەرەنسا کردن، و هەمیش شیوەیل بتەوکردن هاوکاری هاوبەش، ڕای خوەیان لەباوەت گرفتەیل هەولێر-بەغداد، مەترسیەیل داعش لە سوریا و عراق، رەوش سیاسی عراق و سەختیەیل روی عراق کردن.
سەرۆک نێچیروان بارزانی دووارە سوپاس هەرێم کوردستان ورێزی ئەرا پاڵپشتیکردن سیاسی و سەربازی و مرۆیی فەرەنسا پیشکەش کرد، وەتایبەت رۆل سەرۆک ئیمانوێل ماکرۆن و تەقەلایلی ئەرا وەدەسهاوردن ئاسایش و ئارامی لە عراق و ناوچەگە وەگشتی.
بارزانی باس لە ئومیدی کرد ک برادەرەیل عراق دەسمیەتی عراق و هەرێم کوردستان بکەن ئەرا چارەکردن گرفتەیلیان، و دووپات کرد ک وەبی چارەکردن گرفتەیل هەولێر و بەغدا ئارمی سیاسی لە عراق نیەڕەسێدە ئەنجام.
بارزانی، گرفتەیل ناوبەین هەردوگ لایەنەگە جویر کلیلیگ ئەرا ئاسایش و ئارامی لە عراق دادە قەڵەم.
لەلای خوەییش، وەگەرد دووپاتکردنەوەی لەبان وەردەوامی پاڵپشتی فەرەنسا ئەرا هەرێم کوردستان، و رەسانن سڵاو سەرۆک ماکرۆن و سەرۆک ئەنجومەن پیرەیل فەڕەنسی ئەرا سەرۆک نێچیروان بارزانی، کامبون دووپات لە گرنگی قایمکردن پەیوەندیەیل وڵاتەگەی وەرد عراق و هەرێم کوردستان کرد، تایبەت لە چین ئابووری و بەرهەمهاوردن، و ئامادەیی فەرنسا ئەرا دەسمیەتی عراق و هەرێم کوردستان وە چارەکردن گرفتەیلیان و گلەوداین ئارامی نشان دا.
وەگورەی بەیاننامەگە، پەیوەندیەیل عراق و هەرێم کوردستان وەرد دەوڵەتەیل هاوسا، شیوەیل نواگردن هەڕەشەیل داعش، رەوش ئێزدیەیل و مەسیحیەیل و پێکاتەیل هەرێم کوردستان، رەوشەیل ناوچەگە وە شیوەی گشتی، و باوەتەیلیگ گرنگ لەلای هەردوگ لایەنەگە، باسەیلیگ لەناو دیدارە بوین ک قونسوڵ گشتی فەرەنسا لە هەرێم کوردستان و نوینەر حکومەت هەرێم کوردستان لە فەرەنسا ئامادەی بوین.