ئەوەیش لە پیرووزبایی وە بوونەی هاتن سەر ساڵ زایینی نوو هات، وەگورەی بەیاننامەی سەرۆکایەتی وەزیرەیل.
سەرۆک نێچیروان لە پیرووزباییەگە وت: پیرووزبایی وە ساڵ زایینی نوو لە خانەوادە سەربەرزەیل شەهید و پیشمەرگە قارەمانەیل و گشت گەل کوردستان و عراق و گشت جەهان کەیمن، ئومێد خوازم ساڵ نوو بوودە ساڵ وەدەسهاتن ئومید و سەرکەفتن، و کۆتایی جەنگ و ناکۆکی و پەتایل و زیانەیل، و ئاسایش و ئارامی گشت مرۆیی بگرێدەو.
وتیش: بایەتە بەرژەوەنی گەل کوردستان ئەرا گشتمان بووە ئامانج سەرەکی، با لە سەر ساڵ نوو یەکڕزی و دووسی و پشتگردن و ئەوەکە پەسەنکردن و هاوکاری هاوبەش بکەیمنە لاپەڕەی نوویگ ئەرا پەیوەندیەیل ناوبەین پیکاتەیل هەرێم کوردستان، با کار وەیەکەو بکەیمن ئەرا مقەیتیکردن مافەیل دەستووری و فیدڕاڵی و چارەکردن ناکۆکیەیل وەرد حکومەت عراقی لە بنەمای دەستوور.
نێچیروان بارزانی هەمیش دووپاتی لەبان ئەوە نووەو کرد ک هەرێم کوردستان ئەرکەیل و وەرپرسایەتی هاوبەش خوەی جیوەجی کەێد، و هەر جویر هەمیشە کاریگەر ئەرا ئاسایش و ئارامی مینێد، و ئامادەس ئەرا گشت چینەیل هاوکاری وە نواگردن سەختیەیل و چارەکردن گرفتەیل وڵاتەگە وەخاتر وەدەسهاوردن ئاسایش و ئارامی سیاسی و ئەمنی ئەرا عراق وەو شیوەگ ماف و شایستەیل گشت پیکاتەیل وڵاتەگە دابین بکەێد.
هەمیش وت: ئەوەسا کار ئەرا قایمکردن پەیوەندیەیلمان وەرد دەوڵەتەیل هاوسا و ناوچەگە و دەوڵەتە برادەرەیل و هاوپەیمانەیل کەیمن لە بنەمای ریزگردن وەرانوەری و بەرژەوەنی هاوبەش، و ئەوەشدا وەردەوامی لە کار هاوبەش دەیکەن ئەرا نواگردن مەترسی و هەڕەشەیل تیرۆر و لەناوبردن تیرۆرستەیل،و وەیەکەو ئەرا بتەوکردن ئاشتی و ئاسایش و ئارامی کار کەیمن.
سەرۆک هەرێم کوردستان وتیش: ئەوەسا کار ئەرا خاسەوکردن ژیان هاوڵاتییەیل کەیمن، و بتەوکردن هەمەڕەنگی و وەیەکەوژیان و وەخشین و مقەیتیکردن دیموکراتی و ماف مرۆڤ و یەکسانی و ئازادی، و داوای تەندروسی و سەرکەفتن و خوەشی و کامەرانی ئەرا گشتی کەیمن.