سەرۆک نێچیروان بارزانی لە بەیاننامەیگ وەبوونەی سەر ساڵ ئێزدی وت: پیرووزبایی گەرمیگ لە خوەشک و برا ئێزدیەیل لە کوردستان و عراق و گشت شوینیگ لە جەهان کەم، وە بوونەی سەر ساڵ ئێزدی، و ئومید جەژن و پشوو خوەشی و ئارامیگ ئەرایان خوازم.

وتیش: رێز و سڵاوم ئەرا خانەوادە و قوربانیەیل تیرۆر لە ئێزدیەیل، هەمیشە دڵمان هالایان، و دووپات کەیمن ک ئیمە هەر وەردەوامیمن لە کارکردن لە ڕزگارکردنیان ئاشکراکردن چارەنویسیان تا ئەوەنە یەک ئێزدی بیسەروشوین و رفیاگ هەس.

لە ٣ی ئاب ٢٠١٤، ریخریاگ داعش پەلامار قەزای شنگال لە پارێزگای نەینەوا دا، ک رەسیە کوشیان و زەخمداری شمارەی گەورەیگ لە ئێزدیەیل وەگەرد سەرگەردانییان و ویرانکردن ناوچەیلیان. 

وەگەرد ئەوەیش، هەزاران لە ژن و مناڵەیل ئێزدی وەدەس ئەندامەیل داعش رفیان، ک هیمان چارەنویس فرەیگیان نادیارە. 

نێچیروان بارزانی سەرۆک هەرێم کوردستان، نویسینگەیگ تایبەت ئەرا ئازادکردن رفیاگەیل ئێزدی واز کرد، و ئی نویسینگە توەنست هەزاران لە رفیاگەیل لە چەنگ داعش ئازاد بکەێد، ک ئەو نویسینگە خوەی وەتەنیا کار کرد، ک هویچ لایەنیگ حکومەتی یا ناودەوڵەتی نەهاتە پیری ئی کارە.