بارزانی لە پەیامیگ کە سەرۆکایەتی هەرێم بڵاوی کردیە، و ئاژانس شەفەق نیوز نووڕیەی، وت: "سەرەخوەشی قویل خوەم لە بنەماڵەی ئەو سەرباز فەرەنسییە (باپتیس کوشۆت) کەم، کە وەگەرد هیزەیل هاوپەیمان ناودەوڵەتی دژ داعش لە خزمەت بویە و لە رویداویگ هاتوچو دویەشەو لەوەخت دیریگ گیانی لەدەسدایە". 

بارزانی وتیش: لەی وەخت سەختە سەرەخوەشی لە کەسوکاریان و سەرۆک ماکرۆن  و حکومەت فەرەنسا کەم و هاوبەش خەم و پەژارەیانم.

بارزانی دووپات کرد، گەل کوردستان پاڵپشتی و هاوکاری هیزە سەربازییەیل فەرەنسا لە چوارچیوەی هاوپەیمان ناودەوڵەتی دژ وە داعش بەرز نرخنێد، کە پاڵپشتی و هاوکاری پیشکەش وە عراق و هەرێم کوردستان کەێد، ئەرا نەهیشتن تیرۆر وە تەواوی، و تا ئیسەیش لەوە وەردەوامن.

سەربازیگ فەرەنسی لە ئەنجام رویداویگ هاتوچو لە عراق گیانی لەدەسدا، کە بەشداری لە ئەرک مەشق و راهێنان ئەرا هیزە چەکدارەیل عراق کرد، وەگورەی راگەیانن ئیمانوێل ماکرۆن سەرۆک فەرەنسا.

وەزارەت وەرگری فەرەنسا راگەیان،  سەربازەگە (باپتیست گاوگو) وەگەرد هاوکاریگی لە ئەنجام رویداویگ هاتوچو مەوقەی ئۆپەراسیۆنیگ مەشق و راهێنان لە عراق زەخمدار بوین، وتیش: سەربازەگە لە خەسەخانەیگ لە شار هەولێر نەشتەرگەری ئەرای کریا ، بەڵام لەوەر زەخمەیلی گیانی لەدەسدا،  هاوڕیەگەی کە زەخمدار بویە، لە خەسەخانەیگ سەربازی لە بەغداد خەفتیە.

 وەگورەی ئەو راگەیاننە "ئەو سەرباز کوشیایە لە فەوجە نۆزدەهەم ئەندازیاری لەناو هیزەیل فەرەنسا بویە و لە مانگ ئایاری ئەمساڵەو هاتیەسە عراق".