شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، سەردان بەغداد کەێد، و یەک رووژ وەپی چوود، ئەوەیش ئەرا تەواوکردن خشتەی کار دیدار و گردەوبوینەیل هەفتەی گوزەشتە وەرد سەرکردەیل سیاسی عراق، وەگورەی بەیاننامەی سەرۆکایەتی هەرێم کوردستان.
بەیاننامەی سەرۆکایەتی وت: دویای ئەو دیدار و گردەوبوینەیلە ک رووژ سێشەممەی گوزەشتە وەرد سەرۆک کۆمار و سەرۆک وەزیرەیل و بڕیگ لە سەرکردەیل سیاسی و گەورە وەرپرسەیل وڵاتەگە ئەنجامیان دا، سەرۆک نێچیروان بارزانی خشتەی کارەیل و دیدار و گردەوبوینەیل ئی رووژەگە بڕێد، و ئەرا هەرێم کوردستان گلەو خوارد تا لە پرسەی قوربانیەیل رویداو تەقیان سیستەم غازە زیاندارەگە لە شار دهۆک ئامادە بوود.
وەگورەی بەیاننامەگە، بڕیارە سەرۆک نێچیروان بارزانی، ئمڕوو، بەرنامەی سەردانەگەی ئەرا بەغدا تەواو بکەێد، دویای زنجیرەی دیدار و گردەوبوینەیل وەرد بڕیگتر لە سەرکردە و گەورە وەرپرسەیل عراق.