شەفەق نیوز/ نێچیرڤان بارزانی سەرۆک هەرێم کوردستان، ئەمروو چوارشەممە، راگەیان بایەدە دەوڵەت عراق کەسوکار و قوربانیەیل لە روی مادی و هەستی قەرەبوو بکەێد، وتیش؛ بایەتە تاوان ئەنفال لە پڕۆگرام خوەنستن و لە گشت شوونیگ بخوازێد بچەسپیەێد.
نێچیرڤان بارزانی سەرۆک هەرێم کوردستان لە ساڵیاد تاوان ئەنفال، پەیامیگ بڵاو کرد و وت: ئمڕوو ١٤ی نیسان یاد سی و سێ ساڵەی ئەنفال بەدناو کەیمن، ک لە یەکیگ لە دڕندەترین تاوانەیل رژیم وەرین عراقە، لەبان سەدان هەزار ژن و پیاو و مناڵ و پیر بیگوناهەیل کوردستان وەبی جیوازی یا وەخشتینیگ کەفتنە ناو بیاوانەیل بی دەرچگن ک مەرگ بڕەکی کریان، وزیاتر لە ١٨٢ هەزار هاووڵاتی وەبیباکی گەلە کوشتن و زنیوەچاڵیان کریان، ژینگە و سرووشت رەنگین وڵاتەگەمان ویران کریا و شوین ژیان لە هەزاران ئاوای و شارۆچکەیل کوردستان وەیەکجاری سڕیانەو.
سەرۆک بارزانی وتیش: لەی یادە، سەر رێز و نەوازش ئەرا گیان پاک شەهیدەیل چەمنیمن، وەرێز و شانازی یادیان کەیمن، و تا هەمیشە لە هویرمان گەل کوردستان وە زنی مینن، رەحمەت ئەرایان وسڵاو و رێز ئەرا خیزانەیل و کەسوکارەیل سەربەرزیان کل کەیمن، ک وەرگری ژان وەئازارەیل قویلیگ وەرگرن، بایەدە هەرچەگ لە توانا بوود خزمەتیک زیاتر و خاستر ئەرا کەسوکارەیل شەهیدەیل پێشکەش بکریەێد.
نێچیرڤان بارزانی باس ئەوەیش کرد، ک بایەدە یاد شەهیدەیل و مێژوو پڕ لە خوین و ئەسرەیلمان بوونە هاندەریگ ئەرا یەکگردن و یەکڕزی و گشتمان وەیەکەو کار ئەرا ئەوە بکەیمن ک جاریگ تر کارەساتیگ وەیجوورە نەکەفێدە سەر گەل کوردستان و لە هیچ شوونیگ وەڕی مرۆیی ناێد.
هەمیش وت: دویای ئەوە ک دادگای باڵای تاوانەیل عراق ئەنفالەکان وە ژینۆساید و تاوانیگ دژوە مرۆیی و تاوان جەنگ لەقەڵەم دا، بایەدە دەوڵەت عراق کەسوکارەیل قوربانیەیل لەروی مادە و هەستی قەرەبوو بکەێد، و داوا کەیمن ئەو ئەرک یاسایی و رەوشتی خوەیە جیوەجی بکەێد و بڕەسێدە دایان.
هەر لیوا داوا لە کۆمەڵگەی ناودەوڵەتیش کەیمن ئەو تاوانەیلە وە ژینۆساید بناسنێد، و بایەدە ئەو تاوانە لە پرۆگرام خوەنستن ولە گشت شوونیگ بخوازێد بچەسپیەێد.