شەفەق نیوز/ لە رووژیگ جۊر ئمڕوو، لە رووژ 14/4/1988 زیاتر لە 20000 هەزار كەس لە ناوچەی گەرمیان ئەنفال کریان، ئەراوە حکومەت هەرێم كوردستان 14/4ی گشت ساڵیگ کردە ساڵیاد قوربانیەیل ئەنفال.  

دەسەڵاتەیل بەعس، لە ٢٩ ئادار ١٩٨٧ بڕیار جیوەجیکردن ئەنفال دان، و ئەو ئەنفالە وە هەشت گام جیوەجی کریا، ک سێیەم گامەیلی لە ناوچەی گەرمیان لە خورماتوو، کەلار، کفری، چەمچەماڵ، و ناحیەیل ننەوجولو سەنگاو  و قادركەرم و چەن شۊن و ناوچەیلیگتر وەڕیەو چگ.  لەو ساڵە، رژیم بەعس، 500 ئاوای و چوار ناحیە خاپوور كرد ک  یەکیگیان ناحیەی (نەوجول)بۊ سەر وە خورماتوو، ک تا ئیسەیش  ئاوەدان نەکریایە، و رژیم بەعس لەو ناوچەیلە زیاتر لە 30000 هەزار هاووڵاتی كورد تەنیا لەوەر كوردبۊنیان ئەنفال كرد، هەرلیوا تەنیا لە یەك رووژ لە 14/4/1988 نزیكەی 20000 هەزار زاڕوو و ژن و گەنج و پیر و پەککەفتگ لە ناوچەی گەرمیان ئەنفال كرد و ئیجا هاوردنەیانە  ناحیەی قۆرەتوو و لەورە بیسەروشۊن کریان.      

لە ئەنفال سێ، (لە ۷ تا ۲۰ی نیسان ۱۹۸۸) ئەنفال سێ ناوچەی گەرمیانی گردەو، گەورەترین پەلامار بۊ لە ساڵ (۱۹۸۸)، ک ناوچەیل دووز، قادرکەرەم، کەلار، کفری، چەمچەماڵ، تێلەکۆ، پێباز، سەنگاو، تەکیە و بەشیگ لە ناوچەی ئاغجەلەری ڕاماڵی گردەو.  زیان گەپیگ  گیانی و مادیی رەسانە  نزیکەی پەنج سەد ئاوای لەو ناوچەیلە، لە (۱٤ی نیسان ۱۹۸۸) چوار ناوچە وەیەک وەخت  خاپوور کریان، نزیکەی20 هەزار ژن و زاڕوو و پیاو ئەرا سەربازگەی (قۆڕەتوو) بریا، ئەراوە ئی رووژە لە هەر ساڵیگ کریاسە رووژ یادکردن تاوانە گەورەگەی ئەنفال لە کوردستان.