دهۆک و کەرکوک چەرمگ پووشن

شەفەق نیوز/ ناوچەیل باکوور کەرکوک و پارێزگای دهۆک، ئمڕوو پەنجشەممە، رەنگ چەرمگ پووشین، لەوەر ئەو شەپۆل وەفرە ک واریە بان ناوچەیل هەرێم کوردستان.

پەیامنێر ئاژانس شەفەق نيوز وت: ناوچەیل ناوڕاس کەرکوک چین سووکیگ لە وەفروارین وەخوەیان دین، نەگ جۊر باکوور پارێزگاگە.

پەیامنێرمان وتیش: بڕیگ لە دانیشتگەیل کەرکوک رۊی وەرەو ناوچەیل باکوور پارێزگاگە کردن، تا وە سیمای وەفرەگە دڵیان خوەش بکەن.

لە دهۆکیش؛ وێنەیلیگ ئاسمانی، سیمای دڵگیریگ ئەرا شارەگە نشان دان، هەنای چەرمگی وەفرەگە پووشیە.

وێنەیلە شار دهۆک لەناوڕاس کۊیەیل چەرمگ نشان دان، و مەیدانەیل شارەگە بۊینەسە قالی وەفرین رەنگینیگ.