عەلی حسێن خەڵک خانەقین ئەرا پەیامنێر ئاژانس شەفەق نیوز ئویشێد: وەی دەسەیلە کورد خانەقین وەشیوەیگ جیاواز لەو ناوچەیل عراق یاد ئیمام حسێن کەن، کە دەسەیل و قرسویل پیاوەیل جیاس لە دەسەی ژنەیل، و وانەیل ئاینییش وەلایەن ئیمام مزگەفتەیل جیاوازە لە ژنەیل (مولایە).
عراقییەیل رسوومەیل کۆمەڵایەتی دیرن و خواردنیگ جیاواز وەی پیرووزی دوو مانگە دروس کەن.
وتیش: لە یەکەمین دە رووژ لەی مانگە رسوومەیل جیاجیا هەس، کە مەردم خێر لەناو جادەیل پیشکەش کەن لە ئاو، چای، کێک، شەربەت، و هەناێ خوەر ئاوا بوود، دەسکریەێدە دەسە و پرسەی پیاوەیل کە هەمیشە وە خوەنستن قورئان دەسوەپی کەێد، ئیجا تا نزیکەی نیم ساعەت پیشکەشکردن وانەی ئایینی، ئیجا دەسکریەێدە نۆحە خوەنین وە کوشتارەگە وەزوان کوردی و عرەبی، جاروباریش وە فارسی، و ئیجا دەسکریەێدە سینەزەن وە دەس و وە زنجیر، وەگەرد کوشتیان دهوڵ و بەرزەوکردن پەرچەم ناوڕاس دەسەگە، ئیجا وە خوەنستن دوعا کۆتایی وەپی تیەێد.
حسێن هەمیش ئویشێد؛ چای و ئاو و میوە لەناو دەسەگە بەشەو کریەێد جویر خێریگ لە خەڵک خانەقین و پیاو و گەنج و زاڕووەیل لە گشت تایفە و ئاین و نەتەوەیل لەلی بەشداری کەن.
وتیش: بەشیگ لە دەسەیل ئیوارەی رووژ شەش موحەرەم دەرچنە ناو جادە وە سینەزەنی، و پەرچەم حسێنی و نۆحە وەی کوشتارە وە چەن زوانبگ خوەنن، وەلێ فرەگەی شیوەزار فەیلیە.
خانەقینیەیل لە کورد فەیلیر لە رووژ هەفتەم یاد هەزرەت عەباس کەن، و لە رووژ هەشتەم ئەرا ئیمام قاسم، و نوهەم ئەرا عەبوللڵای کوورپەی کوڕ ئیمام حسێن، و لە رووژ دەهەم رەسێدە لویتکە، کە رووژ کوشتارە.
لەلای خوەییش، فەرماندەیل پولیس خانەقین ئەرا پەیامنێر ئاژانس شەفەق نیوز دووپات کردن کە مقیەتیکردن دەسەیل ئمساڵ ١٠٠٪ بویە ئەرک پولیس خانەقین وەبی هەر لایەنیگ ترەک، تەنانەت هاوڵاتیەیلیش کاریان وەوە نییە، کە هەر دەسەیگ حوسەینی دەوریەیگ پولیس کەفێدە گەردی، و ئیواران دەوریەیل وەرد دەسەیل دەرچن، و مەفرەزەیل لە وەردەم حوسەینیە و مزگەفتەیل وسیەن.