شەفەق نیوز/ چایخانەی کەلتوری عەبدولمەجید لوتفی، لە شار خانەقین، ئیوارەی ئمڕوو جمعە، کۆڕیگ لە شعر و مۆسیقا و گورانی وە بەشداربوین بڕیگ لە هونەرمەنەیل شارە دابڕیایەگە، و ئامادەبوین ژمارەیگ لە گەنجەیل و هونەر دووسەیل  ئەنجام دا.

هونەرمن وگورانیچڕ محمد نەبیل ک بەشدار بویە لەو کۆڕە ئەرا ئاژانس شەفەق نیوز وت: خوازیمن سەردی زمسانەگە و ماوەیگ لە سەردەوبوین مەردمەگە لە چالاکی هونەری لەوەر قەیران کۆڕۆنا و قەیران دارایی وەی کۆڕە گەرمەو بکەیمن، و خوەشمان هات هونەرمەنەیل وشاعرەیلیگ  گەنج لە خەڵک خانەقین ئەرا مەردمەگە بناسنیمن، ئەراوە بڕیگ لە دەنگ خوەشەگان و شاعرەگان لەی کۆڕە ئەرا یەکەم جارە بەشدار بوین، و دەسخوەشی لە ئامادەبویەگان وەخوەیان دین، و ئەوە نشان دەێد ک شار خانەقین هەمیشە نەوەی هونەرمەن و شاعریەیل زاێد.

کەنعان حاتەم خاوەن چایخانەگە ئەرا ئاژانس شەفەق نیوز وت؛ هەرچەن رخمان لە پەتای کۆڕۆنا و بنچینە نووەگەی چوود، وەلی داوا لە ئامادە بویەگان و بەشدارەگان لە وەخت مکیس کردنیان کردیمن ک تەنیا ئەو کەسە ک وەخوەیەو دوینێد ک نیشانەیل پەتاگە وەپیەو نییە باێدە کۆڕەگە، و ئەوەیش لە بنەمای بڕواییمان وە خەڵکەگە، وهەمیش لە گرنگی وەردەوامبوین چالاکیە هونەری و رووشنهویریەگان، ک  رووشنهویری خوەی کلیل وازکردن گشت قەیرانەگانە.