سەروەر عەلی دەلو  چالاکوان مەدەنی و پسپۆڕ لە کاروبار ئاسەواری  ئەرا ئاژانس شەفەق نیوز وت: خانەقین زیاتر لە 70 هێمای "پەناگە و سەنگەر"  هیزەیل رووس هاناوی کە لە سەردەم جەنگ جەهانی یەکەم چینەسە ناوچەیل خانەقین، لە ماوەی ساڵەیل ١٩٠٠-١٩١٧.

سەروەر دەلو وتیش، ئەو پەناگەیلە کەفنە جەرگەی خانەقین و ناوچەیل عەلیاوە و نەفتخانە و نزیک کۆمەڵگەی نیشتەجیبوین ئەڵوەن سیتی و ناوچە جیاجیایل تر".

 وە قسەی میژونویسەیل، پەناگەیل سەنگەرەیل وەسەنگ چنینە، هاوشیوەی ژووریگ چوارسویکەن،  کە لە هەر لاییگ دەروەچیگ بویچگ ئەرا تەقەکردن هەس، کە سەربازەیل رووسیا لە جەنگیان وەگەرد سوپای عوسمانی وەکار هاوردنە، هەرلیوا نویسین و تێبینییەیل لەناوی کە سەربازە رووسییەیل دویای کیشتنیان وەجی هیشتنە.

 سەروەر دەلو  داوا لە ئیدارەی خانەقین و حکومەت دیالە و بەش ئاسەواری کرد، مقیەتی شوینەوارە میژووی و ئاسەواریەیل خانەقین بکەن و نوای ئازاربەخشەیل بگرن.

باس ئەوەیش کرد ک لایەنەیل یەکیگ لە پەناگەیل لاوردنە و یەکیگیش لە کۆمەڵگەی ئەڵوەن سیتی لەناو بردنە  وەبی ئەوەگ وە هویچ ریکاریگ ریگریکردن لە نوای جیوەجی بکەن.

وتیش؛  ئاگادار دەسەڵاتیل کردگە لە بەد وەکارهاوردن و سڕینەوەی شوینەوارە ئاسەواریەیل، و دوو "پەناگە" لە ماوەی مانگیگ رمیان و لاوریانە، وەبی ئەوەگ هویچ وەڵامیگ و ریکاریگ تا ئیسە جیوەجی بکریەێد.

 وەپەی داتایل میژوویی، هووزەیل دیالە وەگەرد ئیمپراتۆریەت عوسمانی جەنگ لەنوای هیزەیل رووس ک هاوپەیمان ئینگلیز جەنگ بویە  جەنگ کردنە، دویای رەسین هیزەیل رووسیا ئەرا قەزای خانەقین، کە ناوچەگە لەژیر دەسەڵات بەریتانیا بویە، یەیش هیشتیە رووس قەڵا و سەنگەر وە سەنگ دروس بکەێد  ئەرا سەربازەیلی لە سنوور خانەقین وەگەرد ئیران، لە ساڵ ١٩١٧ هیزەیل رووسیا قەزای خانەقین چووڵ کردن و وەرەو  ئیران کیشانەو.