شەفەق نیوز/ وەرپرسیگ سیاسی کورد لە دیالە، ئمڕوو دووشەممە زوت: فرەی ناوچەیل دابڕیای لەناو پارێزگاگە، ئارەزوو دیرن بچنە ناو هەرێم کوردستان و کۆتایی وە گرفت وکەڵەکەبویەیلیان بارن ک حکومەتەیل پشتاوپشت چارەیان نەکردن، و دووپات لە نەوین هویچ تەقەلایگ ئەرا جیاوەبوین لە عراق نییە، وەو شیوە ک بەد لەلی رەسینەو.

ئیبراهیم حەسەن وەرپرس راگەیانن ناوەند رێکخستن خانەقین لە یەکێتی نیشتمانی کوردستان ئەرا ئاژانس شەفەق نیوز وت: پشتگووشخستن حکومەت لە جیوەجیکردن دەق دەستووری تایبەت وە ناوچەیل دابڕیای هیشت حکومەت هەرێم کوردستان ریفراندۆم جیوەجی بکەێد، جویر پەیام و دووپاتی ئەرا گەل کورد لە بڕیاردان چارەنویسی وەرد حکومەت هەرێم کوردستان و گونجیان رەوشەیل وکۆتایی هاوردن وە گرفت و کەڵەکەبویەیل ک زەرەدەیلیگ کۆمەڵایەتی و ئەمنی گەورەیگ رەسانە ئەو ناوچەیلە ک فرەیان کوردە.

وتیش: ریفراندۆم زەمینەسازی بوێ ئەرا کۆتاییهاوردن وە گرفتەیل دەستووری و بەد رەسینەوە لەباوەت ناکۆکیەیل ناوبەین حکومەت هەرێم کوردستان و حکومەت فیدراڵی، ک گەل عراق باجەگەی دا.

حەسەن دیاری کرد ک هەرێم و گەل کوردستان گەیای جیوەجیکردن دەقەیل دەستووری لە ناوچەیل دابڕیای نیەکەێد، باوجی هەر دەقەیل پابەندییگە لەبان حکومەت، وەلێ هویچ گامیگ لەی باوەتە نەهاتە وەرەو، لە وەختیگ دەستوور نویسیاگە تا ئیسە.

حەسەن دووپات کرد ک نزیکەی ٩٥% لە گەل کورد ئارەزوو دیرێد و خوازێد بچوودە ناو هەرێم کوردستان لە ناوچەیل دابڕیای و زۆرینەی کورد، دووپات کرد ک هویچ تەقەلایگ ئەرا جیاوەبوین نییە وەەو جویرەگ لە ئامانج راسی ریفراندۆم بەد رەسینەو، و ڕازی وە سزادان گەل کورد نەوی وەرانوەر داواکردن مافەیل چارەنویسی شەرعیی.

وتیش: رەوشەیل لە ناوچەیل دابڕیای لە دیالە و پارێزگاگە وەگشتی وەرەو گەنتر چوود، لەوەر پشتگووشخستن حکومەتی و پەراویزخستن دەقەیل دەستووری و زاقتریان مادەی ١٤٠، ک جویر کلیلیگ ئەرا چارەکردن گشت گرفتەیل ئەو ناوچە دانریا.