شەفەق نیوز/ دکتۆر پشدەر عەبدولڵا وەڕیەوبەر خەسەخانەی "دکتۆر جەمال ئەحمەد رەشید"، ئمڕوو یەکشەممە، راگەیان بڕ گەورەیگ لە مناڵەیل لەوەر زگچین وهەڵاوردن هاتنەسە ناو بەش فریاکەفتن لە خەسەخانەگە، وتیش ئیمە هایمنە لویتکەی پەتاگە. 

عەبدولڵا لە کۆنگرەیگ رووژنامەوانی وت" زگچین وهەڵاوردن لە سلێمانی بەرزەو بوود، ومەزەنە هەس زیاتر بەرزەو بوود، وتیش: شمارەیل بێمارەیل فرە فرەس، وتا ئیسە نزیکەی ١٤٠ مناڵ بیمار هاتیەسە خەسەخانەگە.  

ودیاری کرد ک لەناو ئی شمارە ١٢١ مناڵ لە بەش فریاکەفتن خەفتنە، ٩٥ لەلیان تویش ئەو زگچین وهەڵاوردنە هاتنە ک ئیسە بڵاو بویە، و بەشیگیان تویش بیمارییگ ڤایرۆسی هاتنە، و بەشیگیان حەساسیە لە چینیگ لە خوەراک دیرن.  

هەمیش باس ئەوە کرد ک ئەوسا ئی تویشهاتنەیلە بویە، ودیای بڵاوبوین ڤایرۆس کۆرۆنا، یە گەورەترین شمارەس باێدە خەسەخانە، و یە یەکەم جارە لە سێ ساڵ گوزەشتە ئی شمارەی گەورە لە بیمارەیل توومار بکریەێد.  

عەبدولڵا هەمیش مەزەنەی زیایبوین شمارەی ئەو مناڵەیلە کرد ک وەی بیماریە تویش هاتنە، وتیش: هاتێ ئیسە لە لویتکەگەی بویمن، ومەزەنە هەس وەگەرد وەرز گەرمی تاوسان شەپوولیگتر لەی بیماریە بوود. 

وتیش: رخ تویشهاتن وە بیماری کولیرا هەمیشە نزیکە ئەراوە نموونەی وەشکین ئی بیماریە لە فرەی ئەو مناڵەیلە بەیمن، باوجی تا ئیسە هویچ تویشهاتنیگ وە کولیرا توومار نەکریایە.