شەفەق نیوز/ حەمەی حاجی مەحمود سکرتێر حزب سۆشیالیست دیموکراتی کوردستانی، ئمڕوو چوارشەممە، داوا لە حكومەت هەرێم کوردستان کرد ری وە هیزەیل حزبەگەی بیەێد تا وەرەو خانەقین جویلە بکەن، ئەوەیش دویای داوای کیشانەوەی هیزەیل کورد وەرەو دەیشت قەزاگە لەلایەن فەرماندەیی ئۆپراسیۆنەیل دیالە.
ئەوەیش لە پەیامیگ هات لەلایەن حاجی مەحمود ئەرا وەزارەت پیشمەرگە و حکومەت هەرێم کوردستان لەبوەر رەوشەیل لە خانەقین.
کاک حەمە وت: هەرچەن رەوشەگە بەدە، و شیرازەی دەوڵەت هەرچەن یە ساڵیگە هەڵوژاردن پەرلەمانی ئەنجام دریاگە گوما بویە، باوجی هیمان حکومەت دروس نەویە، وتیش: لەبان ئی رەوش بەدە حکومەت عراقیش هیمان کورد لە هویری نەچگە، و وەزیر نەفت و دادگایل هەر رووژیگ هەڕەشە و گیچەڵ ئەرا هەرێم کوردستان دروس کەن.
وتیش: لە ناوچەیل دابڕیاگ کورد لە ماڵ باوگ و باپیریان قاو دریەن ، وەگەرد ئەوەیش هیمان مردگەیل کورد لەناو قەورسانەیل لەو ناوچەیلە لەوەکان فرەترن، ک ئیوە نووڕین دەسوەسەر کریانە، وئیسە هاتنە ناو شار خانەقین و کەفنە سیاسەت تەعریبکردن کورد و هەڕەشەیان دەن.
وتیش: ئەگەر حکومەت هەرێم کوردستان پابەندییگ دیرێد و نیەتوەنێد هیز وەکار بارێد، داوا لەلیدان کەم ری بیەنە هیز حزب سۆشیالیست تا وە ماوەی چەن ساعەتیگ بڕەسنە خانەقین، و ری وە بیگانەیل نەیەیمن پۆستاڵی سیایان لەبان خانەقین بچەسپنن.