سەرچەوەگە ئەرا ئاژانس شەفەق نیوز وت: ئەندازیاریگ (لەداڵگبوی 1983)، لە ئەنجام رویداویگ دڵتەزن مەوقەی کارکردنی لەناو بیناکردن مۆڵ کارفور لە کۆمەڵگەی نیشتەجییوین بەسمایە گیانی لەدەسدا، و دیاری کرد کە پارچەی ئاسن لە کرێن کەفتە بان سەری، و وەکوتپڕ گیانی لەدەسدا.

هەمیش لە بەغداد، سەرچەوەیگ ئەمنی ئەرا ئاژانس شەفەق نیوز وت: دوو پیاو و ژنیگ کوشیان و پیاییگ ترەک زەخمدار بوی، لە ئەنجام رویداویگ هاتوچو دڵتەزن لە قەزای مەحمودیە باشوور بەغداد.

سەرچەوەگە وتیش: ئەو کەسەیلە ماشینیان کەفتە ناو جوویگ ئاویاری.

دیاری کرد کە زەخمدارەیل ئەرا خەسەخانە بریان، و تەرم قوربانیەیل ئەرا پزشک دادوەری کلکریا، و لێکۆڵینەوە لە رویداوەگە واز کریا.

لە کەرکوک، سەرچەوەیگ پزشکی خەوەردا لە خنکیان مناڵیگ لە تەمەن دوو ساڵان، هەنای کەفتە ناو چاڵ ئاویگ نزیک ماڵیان.

سەرچەوەگە وتیش؛ رویداوەگە لە گەڕەک قادسیە بویە لە ناوڕاس کەرکوک، و مناڵەگە نزیک چاڵە ئاویگ بازی کردیە، و کەفتیەسە ناو چاڵەگە و خنکیاس، و دویای ئەوە خیزانەگەی کەفتنەسە فتراقی و دەسکردنە مینەکردن، تا لەناو چاڵەگە وە مردگی پەیای کردن.

سەرچەوەگە وتیش: پولیس رەسیە شوین رویداوەگە، و تەرمەگە ئەرا پزشک دادوەری کلکرد، و لێکۆڵینەوە لە رویداوەگە واز کرد.