شەفەق نیوز/ سەرچەوەیگ لە پولیس عراق، ئمڕوو شەممە، خەوەردا لە کەفتن چوار قوربانی لە هیزەیل سوپا، وە پەلاماریگ لەلایەن ریخریاگ داعش باکوور خوەرئاوای کەرکوک.

سەرچەوەگە ئەرا ئاژانس شەفەق نیوز وت: ئەندامەیل داعش، شەفەق ئمڕوو، پەلاماریگ لەبان سوپای عراق لە قەزای دوبز جیوەجی کردن، ک بویە هووکار کوشیان چوار سەرباز.

سەرچەوەگە وتیش: ئەندامەیل داعش چەک و ئامێر پەیوەندی سەربازی و مۆبایلەیل قوربانیەیل دزینە.

وتیش: فەریق روکن عەلی فرئجی فەرماندەی بارەگای پیشکەفتگ ئۆپراسیۆنەیل هاوبەش/ کەرکوک، روی وەرەو شوین رویداوەگە کرد، و دەسکردە هەڵمەتیگ وەشکین وەمینەی پەلاماردەرەیل.

سەرچەوەگە وتیش: فەرماندەی فەوج یەکەم و ئەفسەر هەواڵگری فەوج یەکەم لیوای ٣١ سوپای عراق لەبان ئەو پەلامارە دەسوەسەر کریان.