پەیامنێر ئاژانس شەفەق نیوز ڕاگەیان، دویای تەواوبوین نیساب یاسایی، وە ئامادەبوین 191 ئەندام بلۆکە جیاوازەیل پەرلەمان، محمد حەلبوسی، سەرۆک پەرلەمان دانیشتنەگە واز کرد.

 وتیش؛ ئەنجومەن دەنگدا وە زیادکردن دوو بڕگە ئەرا بەرنامەی کارەگەی، یەکیگیان پەیوەندی وە دەرکردن بڕیاریگ دیرێد لەباوەت بە کارەسات حەمدانیە و ئەوەکەی ترەک  دەنگدان لەبان شمارەیگ پلە تایبەت.

 ئەنجومەن دەنگ لەبان تەمەیلی دا ئەرا دەسەڵات جیوەجیکردن ئەرا قەرەبووکردن دارایی ئەوانەگ زیان وەپیان رەسیە، کلکردن بڕیگ زەخمدار مەترسیدار، و پرسیارکردن وەگەرد هەر کەسيگ کە چەسپیاگە کەمتەرخەم بویە لە کارەسات هۆڵ سویر لە حەمدانیە.

هەرلیوا ئەنجومەن دەنگ لەبان بڕیگ پلەی تایبەت دا، ئەوانیش دانان عەلی یوسف شوکری - سەرۆک دەسەی ڕاوێژکاران و پسپۆڕان لە سەرۆکایەتی کۆمار (ئاماژەیگ ئەرا نامەی سەرۆکی کۆمار)، و پەسەنکردنی لە هەڵوژاردن باسم محەمەد یونس ئەلجبوری جویر سەرۆک کۆمیسیۆن لێپرسینەوە و دادپەروەری، و سەڵاح موزاحیم جویر جیگر سەرۆک (ئاماژەیگ ئەرا کتاو کۆمیسیۆن لێپرسینەوە و دادپەروەری).