شەفەق نیوز/ دو سەرچەوەی ئەمنی، ئمڕوو جومعە خەوەردان، لە پەیاکردن تەرم مناڵیگ لە دەوروبەر کەرکوک، و زەخمداری دو کەس وە پەلاماریگ چەکداری لە زیقار. 

سەرچەوەیگ لە کەرکوک  ئەرا شەفەق نیوز وت: " دەزگایەیل ئەمنی تەرم مناڵیگ پەیاکردنە( ئەیوب ئەحمەد مەهدی) لە گەرەگ خەزرا سەر وە پارێزگای کەرکوک، دویای دو ڕووژ لە دیارنەمانی". 

سەرچەوەگە وتیش، " مناڵەگە خەڵک شار بێجیە لە پارێزگای سەڵاحەدین"، وتیش " دەزگایەیل ئەمنی لێکۆڵینەوە وازکردنە ئەرا ئاشکەراکردن هووکارەیل و باروودۆخ ئەو رویداو نادیارە".

سەرچەوەیگتر وە ئاژانسەگە خەوەردا،" دو کەس زەخمداربوین وە پەلاماریگ چەکداری لە گەرەک ئوور لەناوراس شار ناسریە"، دیاریکرد، " لایەن ئەنجامدارەیل کەسوکار نزیک زەخمدارەیلن".

سەرچەوەگە ئاشکەرایکرد، " هووکار پەلامارەگە چوودەو ئەرا گێچەڵ خیزانی  لە مابەین هەردوگلا، و هێزەیل ئەمنی ئاخڵەی شوین رویداوەگە دانەو زەخمدارەیل ئەرا خەسخانە کلکریانە ئەرا وەرگردن چارەسەر".